TXIRRINDULARITZA. Piztu bezala itzali da sua

Gehiegi ez zen falta Giroko zortzigarren etapa amaitzeko. 30 kilometro pasatxo, eta jada 170 hanketan pilatuta. Eguneko ihesaldia zihoan aurretik, eta atzetik, berriz, gertu, gainean ia, Lampre tropeletik tiraka. Colle del Gallo mendatea igotzen hasteko pronto zeuden. Lombardiako Giroko gain mitikoetako bat da -atzo Lombardian jokatu zen etapa guztia-. Eta piztu zen sua lehen maldetan. Damiano Cunegok (Lampre) jo zuen, eta haren gurpilera itsatsi ziren Franco Pellizotti (Liquigas) eta Stefano Garzelli (Acqua&Sapone). Atzetik, berriz, Levi Leipheimer (Astana) mugitu zen. Eta gaina harrapatu baino pixka bat lehenago, Cunego geratu, eta Chris Horner (Astana) zein Michael Rogers (Columbia) batu zitzaizkien Leipheimer Pellizotti eta Garzelliri. Sutan zihoan lasterketa, eta Danilo Di Luca (LPR) liderraren taldea, 50 segundora. Baina tartea handitzeko, liderra estu hartzeko aukera zutenean, aurrean ez zuten ondo elkar ulertu, eztabaidan hasi ziren, eta segituan harrapatu zituzten. Liderrak elkarren zaintzan geratu ziren, eta Kanstantsin Siutsuk (Columbia) jo zuen Bergamora heltzeko 15 kilometroren faltan. Atzean jada apalduta, itzalita zegoen sua, eta 26 urteko bielorrusiarrak bere ibilbideko garaipenik handiena lortu zuen. Columbiaren hirugarrena da aurtengo Corsa Rosan

Di Lucak, berriz, lidertza sendotu zuen. Izan ere, Killerra esprintean sartu zen, etapa hirugarren postuan bukatu, eta gainsariei esker zortzi segundo lortu zituen. Ez dago gaizki, 25 kilometro lehenago estu eta larri hartu baitzuten. Baina aurrekoak ez ziren ados jarri. Aurrena, Gallo igotzen ari ziren bitartean, Garzelli eta Pellizotti italiarrek Horner arbuiatu zuten. Baina hura Leipheimerrek bat egin zain zegoen. Gero, berriz, Edvald Boasson (Columbia), Cunego eta David Arroyoren (Caisse d'Epargne) zain geratu ziren aurrekoak, eta geldialdi horregatik tropelak segundo eder batzuk jan zizkien. Gainera, behin bat eginda ere, Cunegok ez zuen erreleborik eman nahi eta Columbiakoak zein Astanakoek ez zuten egoera garbi ikusten.

LPRkoek, aldiz, bere capitanoarentzako lan egin zuten, buruari hotz eutsi zioten Gabrielle Bosisio eta enparauek, eta, Di Luca bera ez zen gehiegi urduritu. Gainera, Colle Aperton, Bergamoko kaleetan, harbidean, Jaroslav Popovitxen (Astana) erasoari erantzun zion, indartsu dagoela erakusteko. Ordurako, baina, itzalita zegoen lehenago piztutako sua. Bederatzigarren saioa korrituko da gaur Milanen, eta ezin egokiagoa da volatta jokatzeko.

Sailkapenak

ZAZPIGARREN ETAPA

1. K. Siutsu (Columbia) 5.04.34

2. Edvald Boasson (Columbia) 21era

3. Danilo di Luca (LPR) d.b.

4. Michael Rogers (Columbia) d.b.

5. Franco Pellizotti (Liquigas) d.b.

6. S. Garzelli (Acqua&Sapone) d.b.

7. Damiano Cunego (Lampre) d.b.

8. J.Rodriguez (Diquigiovanni) d.b.

59. Iban Maioz (Xacobeo) 5.29ra

61. Iker Camaño (Fuji-Servetto) d.b.

91. David Lopez (Caisse) 12.12ra

93. H. Gonzalez (Fuji-Servetto) d.b.

NAGUSIA

1. Danilo di Luca (LPR) 33.13.35

2. T. Lovkvist (Columbia) 13ra

3. Michael Rogers (Columbia) 44ra

4. Levi Leipheimer (Astana) 51ra

5. Denis Mentxov (Rabobank) 58ra

6. Ivan Basso (Liquigas) 1.14ra

7. Carlos Sastre (Cervelo) 1.24ra

8. Chris Horner (Astana) 1.25era

63. Iker Camaño (Fuji) 25.44ra

72. Iban Maioz (Xacobeo) 29.23ra

73. David Lopez (Caisse) 31.55era

118. Hector Gonzalez (Fuji) 56.21era