Irabazi zuen Italiako Giroko 4. etapa, eta irabazi du 11.a ere. Diego Ulissik (Lampre) ihesean irabazi du Modena eta Asolo arteko etapa, Andrey Amadorri (Movistar) eta Bob Jungelsi (Etixx) esprinta irabazita. Hamahiru segundora iritsi da faborito nagusien tropeltxoa, Giacomo Nizzolo (Trek) buruan zela. Jungelsek jarraitzen du lider, 24 segundora dago Amador, eta 1.07 minutura Alejandro Valverde (Movistar).
Lasaia izan da etaparen lehen zatia, nahiz eta kostata sortu den hiru laguneko ihesaldia: Vegard Stake Laengen (IAM), Anton Vorobiev (Katuxa) eta Liam Bertazzo (Wilier) ibili dira ihesean, baina Forcella Mostaccin laugarren mailako mendate motz baina gogorrean etsi dute azkenean. Une horretan sortu da mugimendua, Amador eta Jungelsena, eta kontraerasoan iritsi da Ulissi, bost kilometro falta zirela. Aurretik erorketa izan da tropelean, eta, besteren artean, 1.30 minutu galdu du Domenico Pozzovivok (Ag2r), 1.49 Jakob Fuglsangek (Astana) eta 2.45 Igor Antonek (Dimension Data).
Noalen hasi eta Bibionen amaitu, lau-laua izango da biharko etapa, 182 kilometrokoa. Ezusterik ezean, esprinta izango da amaieran.
