Alvaro Untoriak 22-15 irabazi dio Danel Elezkanori Bigarren Mailako buruz buruko txapelketako finalean, Iruñeko Labrit pilotalekuan. 19 urte ziren Errioxako pilotari batek ez zuela buruz buruko txapelik janzten, eta Untoriak partida hasieran jarri du bolada hori hausteko oinarria. 14-1 irabazten hasi da, piloteoan gehiago zelako eta Elezkano urduri zegoelako.
Elezkanok arriskatzea baino beste biderik ez zuen, eta erasoan jokatuz 17-12raino gerturatu da. Une horretan, baina, ez du zortea lagun izan. Bi txapa jo ditu jarraian, epaileek buelta zalantzagarria eman dute berak eginiko tanto batean eta gero bote bat gaizki kalkulatu du erresto baten ondoren.
Untoriak merezita jantzi du txapela, eta heldu den urtean Lehen Mailako txapelketa jokatuko du.
