Urdaibai nagusi Kontxako sailkapen proban

Urdaibai izan da jaun eta jabe gaur arratsaldean Kontxako Banderako sailkapen proban. 19:45.80an osatu du estropada, eta, horrenbestez, bigarrenari, Oriori, 11 segundo pasatxoko aldea kendu dio (19:57.52 egin du Oriok).

Hirugarren San Pedro izan da (19:57.64), laugarren Astillero (19:58.08), bosgarren Castro (20:02.30), seigarren Hondarribia (20:08.74) eta zazpigarren Tiran (20:10.30). Beraz, zazpi horiek izango dira etxekoa izateagatik galbaherik pasa gabe sailkatu den Donostiarra-rekin datozen bi igandetan Kontxako badian lehiatuko diren traineruak.

Gaurko sailkapen proba erlojupekoa izan da, eta 23 taldek parte hartu dute. Banaka, baina bi multzotan abiatuta aritu dira lehian. A multzoan San Miguel ligako aurreneko 10 sailkatuak eta Astillero aritu dira, eta B multzoan, berriz, gainerakoak. Zozketa bidez erabaki da A multzokoak ateratzea aurrena. Honakoak dira multzo bakoitzean aritu diren traineruak:

A Multzoa

Tiran, Zumaia, Castro, San Pedro, Zarautz, Cabo da Cruz, Hondarribia, Pedreña, Astillero, Urdaibai eta Orio.

B Multzoa

Camargo, Pasai Donibane, Kaiku, Meira, Arkote, Nautico de Vigo, Laredo, Trintxerpe, Isuntza, Ondarroa, Chapela eta Rianxo.

Sailkatu diren zazpi taldeak A multzokoak dira; Astillero izan ezik beste guztiak San Miguel ligakoak. Hain zuzen ere, A multzo horretatik lau traineru geratu dira Kontxako leihatik kanpo: Zumaia, Zarautz, Cabo da Cruz eta Pedreña.