Lorea Bilbao Bizkaiko Euskara eta Kultura diputatuak aurkeztu du Pablo Berasaluze (Berriz, Bizkaia, 1977) pilotariaren agurrerako antolatu duten jaialdia. Mikel Urrutikoetxea, Mikel Larunbe eta Aimar Olaizola izango dira kantxan, Berasaluzerekin batera.
Bilbaok azaldu du jaialdi "hunkigarria" izango dela eta ikusle bakoitzari Berasaluzeren omenez eginiko kamiseta bat emango diotela. Hamar, hamabost eta hogei euroren truke salduko dituzte sarrerak. Jaialdia 17:45ean hasiko da.
Bergarako frontoian egin zuen debuta, 20 urte zituela, 1998an, eta Bilboko Bizkaia pilotalekuan jokatuko du azkena. Titulurik ez, baina hiru aldiz heldu da binakako txapelketako finalera; 1999an, 2013an eta 2015ean. 35 urterekin, bigarren gaztaroan zegoen azken urteetan.
