Uste baino pixka bat estuago irabazi dio Bera Berak Itxakori (31-21)

Espainiako Superkopako finaleko erreferentzia zeukaten gehienek buruan. Ia entrenamendurik egin gabe, oso itxura apala emanez aritu zen Itxako, eta 42-18 galdu zuen Bidebietan Bera Beraren aurka. Irailaren 1a zen. Krisi ekonomikoak eraginda, azken orduan osatu du taldea Itxakok, eta pixkanaka ari da ligari neurria hartzen. Atzoko itxura da horren erakusgarri. Derbia zeukaten Bera Berak eta Itxakok, Donostian, eta nafarrek nahikoa txukun jokatu zuten. 14-10 atsedenaldian, eta 31-21 azkenerako, ligako liderra tarteka dezente estututa. Donostiarrek bi partidak irabazi dituzte, eta Lizarrakoek biak galdu.

Beste bi euskal taldeek galdu egin zuten atzo. Kukullagak balio handiko garaipena eskuratu zuen joan den astean Castroren pistan (17-19), baina atzo huts egin zuen etxean, Porriñoren aurka (23-30). Zuazo ere ezinean aritu zen, Elx indartsuaren pistan, eta 35-16 galdu zuten bizkaitarrek.