Valentziak esango du Lagun Aro talde handia den edo ez

Ligako zortzi talde onenen artean dago Lagun Aro, merezimendu osoz, baina gaur Valentzian jokatuko duen norgehiagokak taldea norabide batean edo bestean jar dezaketen horietakoa da. Talde handia delako. Lagun Arok aurrekontuz eta baliabidez askoz aberatsagoak diren taldeak menderatu ditu, lortzen ari den garaipen bolada bikainean —Banca Civica edo Gescrap, adibidez—, eta bolada on horri Valentzian segida emateak indar berezia emango lieke donostiarrei.

Besteak beste, datorren ostegunean hasiko den Kopari begira. Azken zortzi partidetatik zazpi irabazi ditu Sito Alonsoren taldeak, eta, ahal den neurrian, indarrean jarraitu behar da. Bolada ona eteten bada ere bai, noski. Valentziak hamabi milioi euroko aurrekontua dauka, Lagun Aroren hirukoitza, eta, gauzak normal joatera, etxean geratu behar luke garaipenak. Rafa Martinez, Nando De Colo, Nik Caner-Medley, Victor Claver, Florent Pietrus... izar asko ditu, baina izenek ez dute izana egiten, eta sasoi honetan ere nahi eta ezin ari dira. Paco Olmos kargugabetu zuten duela bi aste, eta Velimir Perasovic fitxatu. Kroaziarraren debuta ona izan da, baina hamar egun eskas daramatza, eta entrenatzaile aldaketak ekarritako zalantzak baliatzen saiatu behar luke Lagun Arok.

Alonso: «Ilusioa berbera da»

Sito Alonsok motibazio lanaren inguruko arrasto berriak eman zituen herenegungo prentsaurrekoan. Bolada onari garrantzia kendu nahi izan zion, «orain dugun ilusioa eta 2-8 balantzearekin geundenean genuena berbera da. Gauzak ondo egiteko borondatea, kemena eduki du taldeak beti, baina garaipenek ikuspuntua asko aldatzen dute kanpotik begiratzen duzuenontzat. Guk antzera jarraitu dugu lanean».

Perasovicek berri onak eta ez hain onak jaso ditu atarikoan. Bi hilabete kantxetatik at egin ostean, bueltan da Stefan Markovic joko antolatzailea, baina ez dago sasoiko. Serhi Listxuk ukrainarrak, aldiz, ez du jokatuko. Lagun Arori dagokionez, Panko sukarrak jota egon da, baina garaiz osatu da.