Verdascok ezustekoa eman du Murray laugarren zerrendaburua kaleratuta

Fernando Verdascok berea sufritu zuen atzo. Hiru ordu pasatxo behar izan zituen, baina azkenean Andy Murray hartu zuen mendean( 2-6, 6-1, 1-6, 6-3 eta 6-4), eta Australiako Irekiko final-laurdenak jokatzeko sailkatu da. Ezustekoa eman zuen espainiarrak, izan ere, eskoziarra paregabe zebilen denboraldi hasiera honetan Abu Dhabin eta Dohan irabazi eta gero. Laugarren zerrendaburua zen, irabazteko faboritoetako bat irekia hasi baino lehenago, baina atzo 14. zerrendaburuak irabazi zion. Verdascok aurrenekoz jokatuko ditu Grand Slam bateko final-laurdenak, eta Wilfred Tsonga izango da haren aurkaria.

Frantziarrak, berriz, uste baino errazago irabazi zion James Blake estatubatuarrari. Tsonga lunbalgiak jota ibili da Australiako Irekia hasi baino lehenago, eta horregatik zalantza ugari zituen. Halere, lau partida irabazi ditu jada, eta final-laurdenetan dago. Tsongak Rafa Nadali irabazi zion iaz finalerdietan, eta gero Novak Djokovicekin galdu zuen finalean. «Nola eskuinarekin hala ezkerrarekin pilotari gogor ematen dio», esan zuen Verdascok, Tsongari buruz galdetu ziotenean.

Rafa Nadal ATP zerrendako aurrenekoak eta lehen zerrendaburuak ere final-laurdenak jokatuko ditu. Kataluniarrak erraz irabazi zion Fernando Gonzalez txiletarrari (6-3, 6-2 eta 6-4). Nadal da Australiako Irekia irabazteko faborito nagusietako bat; gainera, egin kontu: oraindik ere ez du set bakarra ere galdu jokatu dituen partidetan. Gilles Simon izango da haren aurkaria final-laurdenetan. Frantziarrak Gael Monfils herrikideari irabazi zion. Simonek eta Nadalek hiru aldiz jokatu dute elkarren kontra eta horietako bitan kataluniarra nagusitu da; azkenekoan, aldiz, Madrilgo Master Series Torneoan, Simonek irabazi zuen.

Emakumezkoetan ere lehia ederrak espero dira final-laurdenetan. Jelena Dokic ezustekoa ematen ari da, eta Dinara Safinaren kontra jokatuko du. Carla Suarez espainiarra, berriz, zerrendaburua ere ez zen, baina hor dago: Elena Dementieva izango da haren kontrarioa. Marion Bartolik aukera gutxi dauzka Zvonarevaren kontra, eta lehia bizia espero da Kutznetsova eta Serena Williamsen artean.