Vicente Calderonen neurtuko du sasoia bihar Athleticek

Athleticeko jokalariei kosta egingo zaie ahaztea Atletico Madrilen kontra jokatutako azken norgehiagoka. Ez zuten San Mamesen jokatu. Ez eta Vicente Calderonen ere. Bukaresten aritu ziren. Estadio Nazionalean. Europako Kopako finala izan zen. 3-0 amaitu zen espainiarren alde. Kolpe mingarria, sekula ahazten ez den horietakoa.

Radamel Falcao izan zen finaleko izarra. Tigreak sekulako gol sena erakutsi zuen, munduan gutxik dutenaren modukoa. Baina Marcelo Bielsak eta enparauek bazeukaten Falcaoren berri; ez zela ezustekoa izan, alegia. Finala jokatu arretik, bi talde horiek Vicente Calderonen jokatu zuten Ligako partida; bihar jokatuko duten moduan. Etxekoen gol biak sartu zituen aurrelari kolonbiarrak. Orain ere hura zaindu beharko da gertutik. Falcaori erraz errematatzen ez lagatzea erdiko atzelarien lana izango da. Lortzen baldin badute, Athleticek izango du irabazteko aukera. Baina Falcao ezerezean lagatzeko beste bide bat ere badago, hobea, osoagoa: erdiko aurrelariari gol paseak emateko ardura dutenak indargabetuz gero, are eta errazagoa izango da lehoiek punturen bat lortzea.

Vicente Calderoneko partida azterketa garrantzitsua daAthleticentzat. Zuri-gorriak gaur egun nola dauden jakiteko neurgailu aproposa izango da. Helsinkiren kontrako norgehiagoka baino askoz ere zehatzagoa izango da.

Orain arte, txarretik onetik baino gehiago erakutsi du Athleticek: Slavenen kontra, etxean, hainbestean aritu zen, eta negargarri Kroazian; Betisen kontra nabarmendu egin ziren gabeziak, eta erraztasunak eman zituen; eta Helsinkiren kontra ikusi zen joan den sasoian Europako futbola liluratu zuen taldearen antza izan zuen lehoi kuadrilla. Zein alderdi erakutsiko duen bihar? Auskalo. Athletic ausart aterako da. Irabaztera. Baina taldea zelaian galduta ikusteko arriskua handia da, baloia ez dutenean oso lan eskasa egiten ari baitira Bielsarenak. Opari larregi egiten ari dira.