Wembley dago zerumugan

Urruti dago maiatza, baina gaur eta bihar Txapeldunen Ligako ligaxkari ekingo dioten 32 taldeetatik askok hilabete hori dute jomugan, zehatzago, hilabete horretako 25. eguna, egun horretan jokatuko baita final handia, Londresen, Wembley eraberrituan. Egun horretan jakingo da zein den Europako talderik onena, edo, behintzat, lehiaketa nagusian ondoen aritu dena. Izan ere, nor ausartzen da esaten Chelsea dela egun Europako talderik onena? Londresko taldeak aurreko sasoian erakutsi zuen merezi gabe ere irabaz daitezkeela tituluak. Hura baino askoz gehiago izan ziren Bartzelona eta Bayern Munich finalerdietan eta finalean, baina azkenean, ingelesak nagusitu ziren. Beste guztia sobera zegoen.

Gaurtik aurrera du aukera balentria errepikatzeko. Faboritoen artean dago berriz, azken sasoietako hautagai berek osatzen duten zerrendan: Bartzelonak, Real Madrilek, Bayernek, Manchester Unitedek, Manchester Cityk, Juventusek... Gaur hasiko da lehia, eta hasteko, bi partida nabarmentzen dira: Chelsea eta Juventusenartekoa Londresen, eta Real Madril eta Manchester Cityren artekoa Bernabeun.