Jose Javier Zabaletak agur esan dio buruz buruko txapelketari. Final-laurdenetarako sailkatuta egon ondoren, ezingo du jokatu Mikel Urrutikoetxearen aurka. Etxarrengo atzelariak zuntz-haustura du sorbaldan eta «hainbat aste» beharko ditu sendatzeko. Beraz, Urrutikoetxea zuzenean sailkatuko da finalerdietarako.
Xalak, berriz, atzerapena eskatu du, eta EPELeko epaileak onartu egin du. Eskuko minez dago, eta bere atzerapenak txapelketako hurrengo fasearen data aldaraziko ez duelako onartu du epaileak. Gauzak hala, ekainaren 1ean jokatuko du Mikel Idoateren aurkako final-laurdenetako partida.
Asteburu honetan final-laurdenetako bi partida jokatuko dira: Olaizola II.aren eta Retegi Biren artekoa, igandean, Donostian (17:00); eta Irujo eta Beroizen artekoa, larunbatean, Iruñean (17:00).
