«Azken boladako partida guztiak bezala, Sportingen aurkakoa ere oso partida garrantzitsua da», adierazi zuen atzo Jose Antonio Camachok Taxoaren, asteko azken lan saioa bete ostean. «Azken jardunaldietan mailari eusteko borrokan talde gehiago sartzea da asmoa. Irabaziz gero, Sportingi aurre hartzeaz gain, jardunaldi honetan Betisek eta Mallorcak elkarren aurka jokatzen dutenez, ezingo dute biek irabazi, eta beste aurkari bat ere hortxe izango litzateke borrokan».
Bigarren itzuliko sei jardunaldietan 12 puntu bildu ditu Camachoren taldeak. Lehen itzuli osoan 13 puntu bildu zituztela aintzat hartuz gero, badirudi, kostata izan arren, bide egokia eta zuzena aurkitu dutela nafarrek. Gaur arratsaldeko lehian ere bolada onari segida ematea da asmoa. Sailkapenaren goialdera hurbildu arren, Sporting gain behera doa azken hilabeteotan -azken zazpi partidetatik sei galdu dituzte Preciadok zuzendutako jokalariek-.
Oraindik ez dute partidarik berdindu denboraldia hasiz geroztik, eta Lehen Mailan gol gehien sartu dioten taldea da: 57 gol sartu dizkiete Gijongoei 25 jardunalditan; Numantzia azken sailkatuari baino zortzi gol gehiago. Osasuna, aldiz, sailkapeneko lehen hiruren ostean, gol gutxien jaso duen taldea da, Deportivorekin berdinduta (31 gol). Argi dago Osasuna talde orekatuagoa dela, baina horrek ez du ezer ziurtatzen, eta begi bistakoa da Sportingen arriskua: «Partida guztiak irabaztera zelairatzen da Sporting, eta horregatik ez du oraindik partida bakar bat ere berdindu», esan zuen atzo Camachok.
Walter Pandiani, prest
Aurreko sasoian eta sasoi honen hasieran Walter Pandiani min hartuta egoteak ez zuen kezkarik eragiten Osasunazaleen artean. Ia ez zuen jokatzen uruguaitarrak, eta, jokatzen zuenean, ez zuen ezer onik egiten. Egun, ordea, bestelako egoera batean da Pandiani. Bolada bikainean da. Ondo baldin badago, beti hasieratik jartzen du Camachok, eta taldeko golegile onena da; sei gol sartu ditu dagoeneko.
Horrexegatik, ez da harritzekoa azken egunotan jendea kezkatuta egotea Pandianirekin. Eskuin zangoko koadrizepsean gainkarga bat izan du aste honetan uruguaitarrak, eta asteazkenaz geroztik normal entrenatu gabe dago. Atzo ere ez zuen taldekideek egin zuten lan guztia egiterik izan. Baina, hala eta guztiz ere, hasieratik ariko da gaur, taldeak haren beharra daukala- ko eta golak erraz sartzen ari delako.
