Iaz bezala, Berria.info-k webgune berezi bat jarriko du martxan Iruñeko sanferminen inguruan. Hainbat atal izango ditu webgune horrek: argazki eta bideo bildumak, paperezko albiste, erreportaje eta zutabeak eta Berria telebistaren atal berezia. Halaber, Berriketan.info sare sozialean talde berezi bat egongo da BERRIAko kazetarientzat.
Berria telebistak zuzenean emango du ostiraleko txupinazoa, Euskalerria irratiko audioarekin. Era berean, hilaren 7an, 8an eta 9an Euskalerria irratiaren Sanfermintza irratsaioa emango du Berria telebistak, 12:00etatik 14:00etara. Ondoren ere BERRIAko webgunean izango da ikusgai.
Berria.info-k kazetari bat propio izango du Iruñean webgunerako edukiak sortzen: Ainhoa Arano. Eguneroko albisteez gain, kaleko giroa webgunera ekartzen saiatuko da. Berriketan.info sare sozialean idazteaz gain, Twitterren #berriaSFK etiketa erabiliko du.
Goizero entzierroarekin hasiko dira lanean Berria.info-n. Entzierroaren kontaketa egin eta eguneko ekitaldi garrantzitsuenen berri emango dute. Bideo eta argazki propioen bilduma sareratzeaz gain, herritarrei bideoak eta argazkiak bidaltzeko aukera emango diete. Bideo bat edo argazki bat bidali nahi duenak [email protected]-ra bidali beharko du.
Iruñeko egoitzako taldean, Joserra Senarrek eta Edurne Elizondok Lagunen lagunak zutabea idatziko dute. Azken orrian, berriz, Iñigo Astizek Ezkutuko kronikak egingo ditu.
Komunikazioa
'Berria.info'-k arreta berezia jarriko du sanferminetan, zuzeneko saioak eginez
'Berriketan.info'-n, jaiei buruzko gune berezi bat izango da, eta Twitterren, '#berriaSFK' etiketa erabiliko dute
Iruzkinak
Ez dago iruzkinik
Ordenatu
