Enplegua izango da Internet Egunaren ardatza

Lanerako ezinbesteko erreminta askorentzat, atseden uneetako denbora-pasa besteentzat, edo lana bilatzeko aukera langabeentzat. Herritar guztiei askotariko zerbitzua ematen dien tresna da Internet. Gaurko Interneten Nazioarteko Egunaren harira, hainbat hitzaldi eta ekitaldi antolatuko dituzte sarearen balioa berreste aldera.

Zazpigarren urtez ospatuko dute Interneten eguna, eta sarearen garrantzia berretsiko dute. Aurreko urteetako formatua aldatuko dute edukiak eta guneak dibertsifikatzeko xedez. Egungo egoera ekonomikoa kontuan hartuz, antolatuko diren ekintza asko eta asko enpleguz bilatzera eta prestakuntzara bideratuak egongo dira.

Alfonso Alcantara aholkulariak hitzaldia emango du Barakaldoko (Bizkaia) CEDEMI zentroan, Enplegua eta IKTak jardunaldiaren barruan. Enplegua 2.0, garapen profesionala, gizarte sareak eta produktibitate gaietan aditua da Alcantara. Halaber, Eusko Jaurlaritzaren Irekia sareari , Open Datari eta Novia Salcedori buruzko hitzaldiak emango dituzte, besteak beste.

Bestetik, Zarautzen (Gipuzkoa) eta Laudion (Araba) ere ekitaldiak egingo dituzte. Zarautzen Zure bisitariak zale bihurtu tailerra landuko dute bihar, Sanz Enea kultur etxean. Guneak eta ekitaldiak sustatzeko kontuan hartu beharreko funtsezko alderdiak aztertuko dituzte.

Laudion, berriz, gazte eta helduentzat zuzenduriko Geolokalizazio jardunaldia egingo dute, larunbatean. GPS bidezko bi bilaketa joko egingo dituzte; lehena zortzi urtetik gorakoentzat, eta bigarrena, hemezortzi urtetik gorakoentzat.Internet eta GPS kanpoko jardueretarako hitzaldia emango dute jarraian, Goikogane mendizale taldearen egoitzan.

Ekitaldi horietaz gain, beste hainbat ekitaldi egingo dituzte ere Bizkaian eta Gipuzkoan. Ekitaldi horien ordutegiak eta informazio osagarria www.ieguna.net webgunean eskura daiteke.

Getaria, Interneteko garaile

Internet baliagarria izan zaio Getariari (Gipuzkoa) nazioartean ezagutarazteko. Izan ere, Googlek antolatzen duen Model your town txapelketa irabazi berri du. Google Earth programa erabiliz hiri bakoitzeko eraikinak 3D modeloetan erakustean datza lehiaketa.