Arabako gazteen errealitateaz eta gazte mugimenduaren jardueraz informatzen aritzen den www.gazteiraultza.info webguneak komunikazio jardunaldia antolatu du larunbat honetarako Gasteizko gaztetxean. Mahai inguru batekin hasiko dute 11:00etan. Bertan parte hartuko dute, besteak beste, Hala Bedi irratiko, Euskalherrian.info webguneko, Aiaraldera.com proiektu komunikatiboko eta Topatu.info atariko kideek. Kide bakoitzak ordu laurden batez bere proiektuaren berri emango du. Ondoren, komunikazio askearen inguruan eztabaidatuko dute. Halaber, Gazteiraultza.info-ren etorkizunaz ariko dira.
Herri bazkaria 14:30ean izango da. Eta arratsaldean, 17:00etatik aurrera, desobedientzia ekintzak eta parodiak grabatuko dituzte kalean. Grabazio horiek editatu eta Interneten jarriko dituzte gero. 19:00ak aldera, elektropoteoa hasiko da Musikgerrillaren eskutik. Eta 21:00ak aldera Performance gauari ekingo diote. Arabako hainbat musika taldek parodiak egingo dituzte, «umorez eta errukirik gabe». Gauerditik aurrera DJ Txorik girotuko du gaztetxea, zenbait hamarkadatako soinuen bitartez.
Komunikazioa
Komunikazio jardunaldia etzi, 'Gazteiraultza. info' atariaren eskutik
Larunbat goizean mahai ingurua egingo dute Gasteizko gaztetxean; gauean jaia eta musika izango dira
Iruzkinak
Ez dago iruzkinik
Ordenatu
