'Sut & Blai' ETBko programa sareko atari batean egingo dute

Hamalau urteko bidea egin zuen ETBko Sut & Blai telebista saioak, hezkuntzari eta gazteei lotuta. Baina, joan den abenduan, ETBko zuzendaritzak programa kentzea erabaki zuen. «Hamalau urte igaro ditugu telebistan, Eusko Jaurlaritzako Hezkuntza Unibertsitate eta Ikerketa Sailaren, ikastetxeen, irakasleen eta ikasleen parte hartzeari esker», adierazi dute Pausoka ekoizpen etxeko iturriek. «Denak ere pertsona dibertigarriak eta ameslariak dira, beren eguneroko zeregina gogoz egiten dutenak eta teknologia berriek heziketan izan duten eraginari irteera ematen lanean ari direnak». Horien guztien laguntzarekin aurrera eraman nahi dute Sut & Blai-ren bide berria, Interneten.

Telebista saioa blog bilakatu da www.sutanblai.com helbidean, heziketa komunitaterako, oro har, eta, batez ere, DBHko, Batxilergoko eta Lanbide Heziketako ikasleentzat.

Sut & Blai-k ikus-entzunezko artxibo zabala du ikasketekin lotuta, baita aisialdiaren okupazio sortzailearekin eta gazteriaren ekimenekin harremana duten piezekin ere. Pieza horiek jarriko dituzte blogean, programaren jarraitzaileak eta erabiltzaile berriak biltzeko helburuarekin.

Ibilera berria hasi du www.sutanblai.com blogak Facebooken, Tuentin eta Twitterren. Beste sare sozial batzuetara zabaltzeko asmoa ere badute, «eztabaida, gogoeta eta entretenimendua sortuz». Haien asmoa «sarean kokapen ona» lortzea da.