Xaloa Telebistak egunero jarriko ditu bideoak bere webgune berrian

Baztandik kanpo bizi diren herritarrek hemendik aurrera Xaloa Telebistaren bideoak ikusi ahalko dituzte www.xaloatelebista. com webgune berriari esker. Telebistan emititzen dituzten albistegiak eta erreportajeak jarriko dituzte, baita ekoizten dituzten saio gehienak ere: Herriz herri, Bestak, Ur eta lur, Nire Herrie, Mendialdean Bizi, Lamien artean...

Joseba Igarabide Xaloa Telebistako zuzendariak azaldu duenez, webgune «erabilgarri eta praktikoa» egiten saiatu dira. «Tokiko.tv webgunean bideoak jartzen jarraituko dugu, baina argi genuen gure orrialde propioa behar genuela. Jende gazteak gero eta gehiago bere ordenadorean ikusten ditu telebista saioak, eta hor sartu beharra genuen».

Xaloa Telebista Baztandik kanpo Herriz herri saioa lantzen ari da, eta bertan parte hartu duten nafar askok ezin izan dute programa ikusi. «Webguneari esker, saio horiek ikusteko modua izango dute nafar guztiek».

Telebistan ematen dituzten ahal diren bideo guztiak kargatzen saiatuko diren arren, Igarabidek aitortu du kalitate handiko bideo luzeak igotzeko denbora asko behar dela. «Zuntz optikoarekin eta teknologiaren aurrerapenarekin hori etorkizunean konponduko dela pentsatzen dugu».

Webguneak ikusleari nahi duen bideoa aukeratzea ahalbideratzen dio. «Telebista ikusteko beste modu bat da», dio Igarabidek. Webgunean inkesta bat ere jarriko dute astero.