Bertako aparretan

«Lau euskal marka ekarri ditugu probatzeko: Laugar, The Black Bitch Brewing Company, The Angry Brewery eta ZERB. Denak bizkaitarrak, eta ZERB, Arrasatekoa», azaldu zuen Fernando Garciak, Hontzak konpartsako kideak. Dastatzea gidatua zenez, etxe bakoitzeko ordezkariek beren edariari buruzko azalpenak eman zituzten; mingostasuna,kolorea, arima eta gorputza izan ziren ezpainetan erabili zituzten hitzetariko batzuk, gainerakoenak aparrez bustitzen ziren bitartean. Bi euroren truke, garagardo bakoitzetik baso bana edan ahal izan zuten denek.

Txistulariei eta erraldoiei begira zeudenak ez ziren ohartuko agian, baina garagardozaleek laster sumatu zuten zerbait ezberdina zegoela gertatzear Hontzak konpartsaren txosnan, atzo. Kristalezko edalontziz betetako mahaiak adieraz zezakeen hori, edo haren ondoan zeuden garagardo botilek, bestela. Euskal Herrian ekoiztutako garagardo artisau dastatzea antolatu zuten atzo eguerdian, lehen aldiz. Paretik igaro ziren gehienek amaitu zuten ilaran, edalontzi bana eskutan.

Lau ekoizleek egin zuten bat horretan: multinazional eta garagardo konpainia handien produktutik urrundu nahi dute. Zaporerik gabeko garagardoak edateaz aspertuta, euren gustuko edaria ekoiztea erabaki zuten denek. Baina, horrez gain, beste gabezia bat ere ikusi zuen Nerea Makazagak, ZERBen ekoizleak: «Ohartu ginen ez zegoela Euskal Herriko kalitatezko garagardorik. Horregatik erabaki genuen denen gustuko euskal garagardo bat egitea, gure kulturari lotuta egongo zena». Lau euskal marken izenak pixkanaka merkatuan hedatuz doaz, eta ZERBek, esaterako, aurtengo Donostiako Piraten txosnetara iristea lortu du.

Jendea gustura, eta konpartsakideak ere bai. Ekoizle txikiei bultzada eman nahi dietela azpimarratu zuen Garciak. «Honek merezi du».