Santikutzak Legazpin

Aisialdia, lagunak eta herria egiteko

Sorgintxulo aisialdi taldeak botako du Santikutz jaien hasierako txupinazoa. Hogei urte bete ditu haur eta gazteentzako proiektu horrek
Sorgintxulo aisialdi taldeko gaztetxo eta begiraleak, 2017ko udalekuetan.
Sorgintxulo aisialdi taldeko gaztetxo eta begiraleak, 2017ko udalekuetan. SORGINTXULO Tamaina handiagoan ikusi

Izaro Zinkunegi Barandiaran -

2018ko apirilak 28

Ate joka dira Legazpiko (Gipuzkoa) Santikutz jaiak. Festarako aukera izango da, aisialdiaz gozatzeko. Aukera hori eskaintzen die Sorgintxulo aisialdi taldeak herriko haur eta gaztetxoei. Hogei urte daramatza ekintzak, irteerak eta udalekuak antolatzen. Taldeko kideek botako dute, etzi, jaien hasierako txupinazoa, eta maiatzaren 6ra arte iraungo du festak.

«Herriko familiek osatutako katea da», azaldu du Itsaso Guridi aisialdi taldeko kideak. Ehunka ume, gaztetxo eta begirale izan dira hogei urteotan proiektuaren katebegiak. Hori aitortzeko asmoz, Santikutz jaietako suziria botatzeko proposatu zien udalak. «Ilusioz» hartu dute proposamena. Pregoiari azken ukituak ematen ari direla aitortu du Guridik. Etzi botako dute, eta maiatzaren 6an amaituko dira festak.

Lauzpabost urte daramatza Guridik begirale taldean. Aurretik ere Sorgintxuloko kidea zen, ume moduan parte hartu baitzuen. Egungo begirale gehienek egin dute ibilbide bera. Hori da, haren ustez, bi hamarkada betetzeko giltza. Denak legazpiarrak dira, baita ekintzetan parte hartzen duten ume eta gazteak ere. 35-40 begirale inguru daude, eta borondatez dira taldeko kideak.

Elkarbizitza eta euskara dira taldearen balioak, Guridiren arabera. «Legazpiko kuadrillen arteko hesiak apurtzen saiatzen gara; herriko jendea ezagutu eta lagun berriak egitea bultzatu nahi dugu», azaldu du. Horretarako, hamaika-hamabi ekintza egiten dituzte urtean. Herrian egiten dituzte gehienak, hileko larunbat batean. Irteerak ere egiten dituzte, Txuri Urdinera, esaterako.

Udalekuak dira Sorgintxuloren ekintza nagusia, Guridik azaldu duenez. 12-16 urte arteko gazteekin egiten dituzte, uztaileko bigarren hamabostaldian. Gaztela, Burgos edo Errioxara (Espainia) joaten dira. Harremanak estutzeko balio du uztaileko egonaldiak, haren iritziz: «Udalekuetatik bueltatzean, San Inazio auzoko festak izaten dira. Begirale eta umeak elkarrekin joaten gara parrandara».

«Denon artean aurrera ateratzen dugun zerbait da, eta hor sortzen den giroa itzela da», horrela laburtu ditu udalekuak Guridik. Ordea, nahi duten gazte guztiek ez dute aukerarik udalekuez gozatzeko: «60 lagun joan daitezke gehienez, eta 90 inguruk ematen dute izena; 30 laguneko itxaron zerrenda egoten da».

Guridik azaldu du hogei urteotan ez dela nabaritu belaunaldi aldaketa handirik: «Jendea sartzen denean, ateratzear daudenek erakusten diete zer eta nola egin». Hala ere, aldaketak izan dira: «Taldearen sortzaileek diotenez, lehen errazagoa zen dena. Orain, betebehar gehiago ditugu: osasun kontrolak, baimenak...». Umeak ere aldatu direla uste du: «Gaur egun, teknologiaren behar handiagoa dute gazteek, baita gurasoek ere. Sakelakoak eramaten dituzte ezkutatuta. Lehen ere egiten ziren halakoak, baina ez hainbesteko beharrarekin».

Ikastolari aitortza

Erkatz aisialdi taldetik sortu zen Sorgintxulo, duela hogei urte. «Elizari lotutako taldea zen Erkatz; parrokian zuten lokala, eta han elkartzen ziren. Begiraleek ez zuten loturarik ikusten elizaren eta euren ekintzen artean, eta Sorgintxulo sortu zuten», azaldu du Guridik. Bi hamarkada igaro dira ordutik. Orain arteko bidearekin jarraitzeko asmoa dute taldeko kideek; badituzte bidelagunak ere: «Legazpiko Udalaren eta herritarren babesa daukagu».

Ekintzetan sortutako giro ona eta laguntasuna herrian egunerokoan mantentzea lortzen dutela uste du begiraleak. Horren isla da, esaterako, festetako danborradan parte hartzea. Sorgintxuloko talde bana ateratzen da helduen eta txikien danborradan.

Sorgintxulokoek ez ezik, beste hainbat taldek ere astintzen dituzte atabalak. Haztegi ikastolako taldea aterako da lehenengoz; aurten bete ditu 50 urte. Aitortza ere egingo diote ikastolari, aurtengo Olaria saria jasoko baitu, maiatzaren 3an.

Etzi piztuko da festa Legazpin. Ikuskizunak, kirol probak, jan-edana, kontzertuak, dantzak... denetik izango da zazpi egunez, aisialdiaz gozatzeko.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Ezkerretik eskuinera, Inma Moro, Itziar Llanera eta Begoña Olaskoaga, Arrondegiko osasun etxean. ©LUIS JAUREGIALTZO / FOKU

Aztarnariak zaintzaile

Maite Asensio Lozano

Koronabirusean positibo eman dutenen gertuko kontaktuak bilatzea baino gehiago da aztarnari sistemako kideen lana: gaitzari eta bakartzeari buruzko informazioa emateaz edota zailtasunak dituztenen jarraipena egiteaz ere arduratzen dira.

PCR proba bat, Donostian. ©Idoia Zabaleta, FOKU

Beste 855 positibo atzeman dituzte Hegoaldean

Uxue Rey Gorraiz

Inoiz baino PCR proba gehiago egin dituzte azken egunean: 14.298, zehazki. Horietatik 855 kasutan detektatu dute birusa. 337 Nafarroan detektatu dituzte. Aurreko egunean, laurehunetik gora izan ziren lurralde horretan, lehenbiziko aldiz.

Miren Basaras, EHUko COVID-19aren Zaintza Batzordeko arduraduna. ©EHU

EHUk Miren Basaras izendatu du COVID-19aren Zaintza Batzordearen arduradun

Mikel O. Iribar

Mikrobiologoa eta EHUko irakaslea da Basaras, eta koronabirusaren ikerkuntzan badu esperientziarik. Zaintza Batzordearen lehen erronka EHUko egoera epidemiologikoa zein den aztertzea izango da. 

Susanna Paavilainen eta haren txakurra, Kossi, Helsinkiko aireportuan lanean, atzo. ©MAURI RATILAINEN / EFE

Koronabirusa atzemateko txakurrak erabiltzen hasi dira Finlandian

Edu Lartzanguren

Helsinkiko aireportuan hasi ziren lanean atzo animaliokin. Azterketen arabera, txakurrok kasuen ia %100 usaintzen dituzte, kutsaturiko pertsonak oraindik sintomarik garatu ez baditu ere.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
Izaro Zinkunegi Barandiaran

Informazio osagarria

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna