Klima aldaketak giza eskubideak «kolokan» jarriko ditu, NBEren ustez

«Neurri miopeak» hartzea leporatu die Philip Alston kontalariak gobernu batzuei. Esan du pobreenek jasango dituztela kalte nagusiak

Jon Rejado -

2019ko ekainak 27
Klima aldaketa «mehatxu» bat da giza eskubideentzat eta demokraziarentzat, eta kalte berezia egingo die pobre bizi direnen eskubideei. Ondorio horretara heldu da Philip Alston, Nazio Batuen Erakundeko muturreko pobreziari buruzko kontalaria, klima aldaketari buruz argitaratu berri duen txostenean. Ondorioen artean, nabarmendu du, batetik, pobreenek jasango dutela klima aldaketaren kalte nagusia, «alde handiarekin»; bestetik, zenbait gobernuren jarrera kritikatu du, baita arrisku batez ohartarazi ere: ekimena sektore pribatuei uztea. «Irabazi asmoa dutenengan gehiegizko konfiantza izateak apartheid klimatiko bat eragin dezake».

Alstonek ohartarazi du hainbat gobernuk «neurri miopeak» hartu dituztela klima aldaketari aurre egiteko. «Ez da alarma ahotsik falta, baina ematen du orain arte ez dituztela entzun». Halaber, Alstonek kezka agertu du enpresa pribatuen esku hartzea «ontzat» jotzen delako, dela berrikuntzan egindako ekarpenekin, dela korporazioen bitartez egindako lanarekin. «Irabazi asmoak dituztenengan konfiantza handiegia izateak ia seguru ekarriko ditu giza eskubideen urraketa masiboak». Horrek, mundua klima aldaketara egokitzen lagundu beharrean, «oinarriko zerbitzuak eta gizarte babesa pribatizatzea» eragin dezakeela iragarri du. Adibide gisa baliatu ditu AEBetan egondako suteak: suhiltzaile pribatuak bidali zituzten «luxuzko etxeak salbatzeko».

140 milioi desplazatu

Klima aldaketak egungo desoreka indartuko duela gaineratu du NBEko kontalariak. Iragarri du klima aldaketak 140 milioi desplazatu eragin ditzakeela 2050. urtera arte Asian, Saharaz hegoaldeko Afrikan eta Hego Amerikan. «Txiroenek pairatuko dute klima aldaketaren okerrena, hori eragiteko gutxien egin dutenak diren arren», hausnartu du. Horrek guztiak giza eskubideen etorkizuna kolokan jar dezakeela gaineratu du. «Arriskua dago azken 50 urteetan egindako lana desegiteko: garapenean, mundu mailako osasungintzan, pobrezia urritzea...». Azkenik, ohartarazi du giza eskubideez arduratzen diren erakundeak ia ez direla hasi lanean erronkari heltzeko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna