Bare edo olatu, itsaso

Bi izaera: Zinedine Zidane eta Juergen Klopp. Real Madrileko entrenatzailea lasaia da aulkian; Liverpoolekoa, aldiz, sumendiaren parekoa. Aurrez aurre dira gaur biak Txapeldunen Ligako finalean.
Zinedine Zidane partida batean, lasai antzean.
Zinedine Zidane partida batean, lasai antzean. EFE

Aitor Manterola -

2018ko maiatzak 26
Edozein entrenatzailek ez du balio edozein lekutarako. Klubek eta taldeek ezaugarriak izaten dituzte, direla historikoak, direla egungo jokalarien izaerak sorturikoak, direla bestelakoak. Egungo futbolean, gero eta talde gehiago dira izarrez osatuak, dirua barra-barra erabiliz erakarritakoak. Diotenez, zaila omen da talde horietan entrenatzaile izatea, bai behintzat lehengo moldean, agintari itxuran.

Izarrez josia dago Real Madril, eta azken urteetan ikusi izan da nola ez duen edonork balio talde puska handi hori zuzentzeko. Bi entrenatzaile moldatu dira ondoen, eta biek lortu dituzte arrakastarik handienak denboraren joanean: Vicente del Bosque espainiarrak eta Zinedine Zidane frantziarrak. Biak dira lasaiak, aulkian imintzio handirik egiten ez dutenak, eta izarrez jositako taldeak kudeatzeko beharrezkoa den tenplearen jabe. Egoki-egokiak dira biak Real Madrileko agintea eramateko, agindu gabe aginduz, edo modu bertikalean nagusitu gabe jokalarien aurrean.

Bestelakoa da Juergen Klopp, Liverpooleko nagusia aulkian azken denboraldietan. Partidetan aginduak eman zale, etenik gabe ibili ohi da batetik bestera entrenatzaileek mugimendurako daukaten espazio txikian. Aldagela barruan ere ematen du gauzak argi eta garbi uztearen aldekoa dela, jenio bizikoa.

Taldeek entrenatzailearen ispilu izan behar omen dute. Nolako izaera aulkiko jabeak, halako nortasuna taldeak zelaian. Zidanek eman dio berea Real Madrili, eta talde lasaia da jokoan, gehiegi behartuaren itxura ematen ez duena, gauzak berezkotasunez egiten dituena, jokalarien aparteko maila teknikoa oinarri hartuta. Beste horrenbeste aipa daiteke Liverpoolen inguruan. Su batean jokatzen du, entrenatzailearen izateko eraren moldean. Gora eta behera bizi ibiltzen dira jokalariak, defentsan eta erasoan. Historikoki, Liverpool, Ingalaterrako taldea izaki, joko bizia egin zalea izan da, oldarkorra, eta Klopp alemaniarrak horixe berreskuratu du.

Mila modutara joka daiteke futbolean, eta denak dira baliagarri irabazle izateko. Batzuk besteak baino politagoak izango dira ikusteko, eta ezin da albora utzi ikuskizunaren eta futbolaren arteko balizko loturak sortzen duen eztabaida. Baina irabazi, denek irabazten dute, molde guztietan izan baitira garaile taldeak historian zehar.

Txapeldunen Ligako gaurko finala irabazten duenaren inguruan sortuko da aldeko haizea, eta mila bazterretara zabalduko da taldea gidatzeko molde hori dela balekoa, eta ez bestearena. Klopp bada garaile, haren aldeko armada sortuko da, eta Zidane bada txapeldun, pentsalari mordoa izango du atzetik.

Hausnarketak, ordea, emaitzaz harago egin behar, eta ezinbestean aipatu behar taldea gidatzeko moduez gain beste ezaugarri batzuk ere. Entrenatzailea izatea zer da? Taldea gidatzen bakarrik izan behar da abila? Ezagutza taktikoa bakarrik menderatu behar da? Beste mila galdera egin daitezke, eta erantzuna erraza da: arlo guztiak menderatzen dituena, nagusi. Baina ahaztu gabe talde guztietan ez duela edozeinek balio. Zidane balekoa al litzateke Liverpoolen? Eta Klopp Real Madrilen? Ondo daude dauden lekuan, toki egokian.

TXAPELDUNEN LIGAKO FINALA

Real Madril. Navas; Carvajal, Varane, Ramos, Marcelo; Modric, Casemiro, Kroos, Isco; Benzema eta C. Ronaldo.

Liverpool. Karius; Alexander-Arnold, Lovren, Van Dijk, Robertson; Henderson, Milner, Wijnaldum; Mane, Salah eta Firmino.

Epailea: Mazic (Serbia).

Lekua. Kieveko Olinpiar estadioa (Ukraina).

Ordua. 20:45(A3 eta BeIN).

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna