Senpereko laborantza lur batzuen salmenta oztopatu du Lurzaindiak

«Kolpe handia eman dugu». Pozik atera da Ttotte Elizondo ELBko kidea notarioaren bulegotik. Laborantzako lur batzuen gozamenik gabeko salmentaren berri jakin ondotik, protesta bikoitza egitea erabaki dute Lurzaindiak eta sindikatuak. Elkarretaratzea egin dute Makean (Lapurdi), eroslearen etxean, eta notarioak Baionan duen bulegora jo dute harekin mintzatzeko. «Salmenta hautsia da», adierazi du Dominique Ameztoi Lurzaindiko buruak notarioarekin bildu ondotik.

Ondoko asteetan bilkura bat eginen dute saltzailearen, eroslearen, notarioaren, Saferren eta ELBren artean, salmenta berri baten inguruan adostasuna erdiesteko: «Helburua da lurrak Saferrek, Lurzaindiak edo antzeko egitura batek erostea, laborantzarako egon daitezen», esplikatu du Ameztoik.

Senperen (Lapurdi) kokatuak diren kasik lau hektareako lurrak eta etxebizitza bat dira auzi honen funtsa. Erosleak ez du inolako laborantza jarduerarik, eta Safer laborantza lurrak kudeatzeko egiturak lehentasunez erosteko aukera izan zezan eragozteko «jukutria» egina zuen. Behin baino gehiagotan agertu den jukutria da: lurren jabetza soila eskuratzen dute, gozamenik gabe; asmoa da urte batzuen buruan gozamena eskuratzeko lehentasuna ukaitea.

Lege proposamena

Azken urteetan «aski usu» gertatu dira halakoak, Maryse Cachenault laborariaren hitzetan. «Gertatu da Arbonan, Donibane Lohizunen, Bidarrain... Guretzat ez da onargarria. Safer egituraren eskubidea desbideratzeko jokamoldea da», salatu du.

Arbonan egin zuten okupazioaren ondotik, lege proposamen bat landu zuten, besteak beste, Vincent Bru Modemeko diputatuarekin. «Hainbat neurri badira, Safere egituraren eskubidea indartzeko, laborantzaren erabilpena babesteko eta espekulazioaren aurka borrokatzeko.

Frantziako Asanbleara iritsia da testua, baina ez da oraindik eztabaidatu. «Hautetsiek lan egin behar dute parlamentuan lege hori pasa dadin, baina anartean kasuak badira, eta gu ez gara egoten ahal beha deus egin gabe», adierazi du Cachenaultek.