Naturgunea 08:00etan irekiko dute, baina egunari hasiera 11:00etatik aurrera emango diote,ohikoa den mezarekin batera. Ondoren, 11:30ean, pilota partidak jokatuko dituzte, pasaka eta eskuz. Bazkaldu ostean, haurrak izango dira protagonista 16:00etan egingo den dantzaldian.
Herri kirolen eskaintza ere edukiko dute 17:00etatik aurrera: txingak, harri-jasotzaileak, lokotx bilketa eta aizkolariak. Egunari amaiera emateko, dantzaldia antolatu dute Xabi Dantzaleku DJarekin. Euskal Herri osoko eskulangintzaz eta janariaz gozatzeko aukera ere izango da, eta bi taberna jarriko dira propio egun horretarako, bertaratzen direnen beharrak ase ahal izateko.
Naturaren eremu babestua
Nafarroan dagoen arren, Donostiako Udalarena da Artikutza, 1919az geroztik. Naturguneak 3.700 hektareako eremua hartzen du, eta Euskal Herriko inguru euritsuenetakoa eta zaharrenetakoa da.
2004az geroztik, Europako Natura 2000 sarearen parte da Artikutza, hango basoetako landare eta animalia aniztasuna dela eta. Gune babestu horretara oinez nahiz bizikletaz irits daiteke. Autoarekin sartzeko, ordea, baimen berezia behar izaten da, eta urte osoan San Agustin egunean bakarrik irekitzen ditu ateak Artikutzak.
