Giharrak ongi beroturik

Puntx cocoa dauka basoan Audreyk. Basokoa isuri gabe Qi Gong jestuak egitea, hori du goiz honetako desafioa. Ez zaio batere bateraezina iruditzen. Alderantziz: «Ez banu puntxik edan, ez ninduzun aurkituko hemen!». Plaza erdi honetan, oraindik asfaltoan pegatuak dira bezperako alkohol usainak. Nahiz eta garbitzaileak pasatu diren, hortik zenbait oren lehenago plaza lepo betea zela baieztatzen duen usaina da. Baina hori detaile bat besterik ez da irria ezpainetan Qi Gong-ean ari direnentzat. Laster sartu da publikoa jokoan, eta gustura segitu du izerditzeraino. Besta ere hobeki segitzeko ez dagoela parerik konbentzituak dira denak. Pipatu zigarretak eta edan alkoholen kalteak kanpora bota, berriz hasteko.

Eta txarangak edo haurren danborrada hortik pasatzen direlarik, jestuen erritmoa txaranga edo danborren erritmora egokitu eta, azkenean, ez duela hain gaizki ematen ere ohartzekoa ukan dute. Memento goxo bat da denentzat. Belaunaldi guztiak aurkitzen dira hor. Adin eta maila guztietakoak. Batzuk, irriz, Audrey bezala; besteak, serioago. Baina guztientzako eskuragarri dela.

Eta, funtsean, hori da ere Qi Gong saio honen helburua. Batetik, erakustea eskuragarritasun hori —saioa urririk da—, eta, bestetik, hain zailak ez diren jestu batzuekin sakontasun bat lor daitekeela. Hori berresten du Akord64 elkarteko Frederique Chopinaud irakasleak. Hor dago esplikazioak ematen, frantsesez.

Qi Gong, jatorrian, ez da arte martzial bat. Arte martzialetako, adibidez Taiji Quanarako, hasi aitzin egiten den beroketa bat da. Medikuntza txinatarrari ere lotua da. Baina beroketa soil bat izatetik, aspalditik berezko diziplina ere bilakatua da.

Minbizi zerbitzu zenbaitzuetan eskaintzen da: eriei gaitzaren ondorioak hobeki gainditzeko ematen diete. Artritis dutenentzat ere minak txikitzeko balio du.

Bereziki, hirietan frango garatu da azken urteetan kirol hau, eta,hemen oraindik frango ezezaguna bada ere, gero eta zale gehiago daudela poztu da Chopinaud. Akord64 elkarteak berak hogei bat kide ditu, eta, astero, sei kurtso ematen ditu Baionako Glain aldeko elkartetxean. Baionako besten saioa beren burua ezagutarazteko ezin hobeki zaie. Bat baino gehiago bildu zaizkie informazio bila, nola segi dezaketen jakiteko.

Bada ere animazio bat gehiago segitzeko aukera Baionako besten eguneko animazioan. Jadanik aspalditik eskaintzen da yoga herriko etxe aitzinean. Horrekin segitzen dute ere aurten. Hori bai, biak tenore berean dira, hau da, 10:30ean. Baina biak egunero direnez, batean bat eta bestean bestea egin daiteke.