Aurtengo Geoparkeen Asteak baleazaleak izango ditu ardatz. Geoparkeko hiru herrietan baleazaleen aztarna gehienak aspaldi desagertu baziren ere, Mendatan (Itziar, Deba) talaia baten arrastoak daude. Suhar Arkeologiak indusketa lanak egin ditu han, eta baita Euskal Balezaleen Triskantza dokumentalerako zenbait irudi grabatu ere. Hiru herrietan emango dute filma: astelehenean, Deban; asteartean, Mutrikun; eta, ostegunean, Zumaian. Proiekzioen ostean, solasaldiak gidatuko dituzte arkeologia taldekoek.
Egitasmoak iraungo duen bederatzi egunetan, argazki erakusketa bat egongo da Mutrikuko Zabiel kultur etxean: Itsas hondoen bizilagunak. Euskal kostaldeko itsas hondoak babesteko beharraren inguruko hausnarketa bultzatu nahi du.
Irteera gidatuak
Horrez gain, irteera gidatuak antolatu dituzte. Gaur izango da horietako bat: Nautilus, flyscheko fosilak izenekoa. Mutrikuko Nautilus zentrotik abiatuko da, 16:00etan. Bihar, berriz, Flyscheko olagarroa esperientzian parte hartu ahalko da Zumaian, 10:00etan. Datorren larunbatean, maiatzaren 28an, ibilaldi gidatua egingo dute Mendatako talaiaren indusketara, Itziarko Itxaspe kanpinetik abiatuta, 10:00etan.
Hitzaldi bat ere antolatu dute, Euskal ontzigintza eta ontziolak izenburupean. Asteartean izango da, Mutrikuko Zabiel kultur etxean, 19:00etan.
Ostiralerako, haurrentzako jarduerak antolatu dituzte Debako Agirre jauregian, 17:30ean. Zetazeoei buruzko tailerra egingo du Donostiako Aquariumak, eta, jarraian, Balearen Bila lehiaketako sari banaketa izango da.
Larunbatean, 19:00etan, Kepa Junkerak eta Sorginak taldeak emanaldia egingo dute Zumaiako Alondegia kultur etxean. Marea Zumaian abesti berria eta flyschetan grabatutako bideoklipa aurkeztuko dituzte.
Asteari amaiera emateko, igandean, Geoparkeko interpretazio gune berriaren inaugurazioa egingo dute Lasturreko aterpetxean (Deba). 10:30ean hasiko da ekitaldia, eta, segidan, Hector Fano geologoak bisita gidatu bat egingo du herrian.
