Duela bi hamarkada hasi ziren Balmasedan Erdi Aroko azoka egiten. Herriaren 800. urteurrenaren harira jaio zen azoka, eta ezinbesteko bihurtu da jada. Antolatzaileek azaldu dutenez, herritarren parte hartzea da, besteak beste, arrakastaren giltza. Euskal Herriko eta atzerriko hamabost konpainia inguru arduratuko dira Erdi Aroko azoka kolorez eta ikuskizunez betetzeaz.
Hamaika ikuskizun izango dira egunotan Balmasedako azokan. Aipagarriena, akaso, XVII. mendeko Inkisizioa eta eskumikuak antzezlana. Jose Angel Ramon Zarrak zuzendu du obra, eta Balmasedako 400 herritarrek antzeztuko dute. Familia osoek parte hartuko dutela aurreratu du obraren zuzendariak. Inkisizioak 1600. urtean herrian eragin zuen beldurra gogoratuko dute, baita garai hartako eskumikuak ere. Erdi Aroko herriko bizitza ezagutu ahal izango dute, beraz, antzezlana ikustera doazenek. Gaur egingo dute, 12:00etan, San Severino plazan.
Erdi Aroko garrak
Goizetik hasiko dira ikuskizunak Balmasedan; 11:00etan ekingo diote, eta egitarau bete-betea izango dute iluntzera arte: azokako postuak, musika emanaldiak, antzezlanak, lanbideen tailerrak, akrobaziak, animalien txokoak... Haur eta gaztetxoentzako jarduerak ere izango dira Balmasedako kaleetan. Zazpi eremutan banatu dituzte ekintzak: San Severino plazan, Martin Mendia kalean, San Juan plazan, Pio Bermejillo kalean, San Severino txokoan, Korreria kalean eta Dorre kalean.
Erdi Aroko azokako ekintzak gauera arte luzatuko dira. Hain justu, suari lotutako ikuskizunen txanda izango da eguna iluntzean. Besteak beste, Companyia del Foc konpainiak berariaz sortutako ikuskizuna izango da gaur, 22:15ean, San Severino plazan. Halaber, kontzertuez ere gozatu ahalko dute balmasedarrek egunaren amaieran.
«Herriko Alde Zaharra Erdi Arokoa da guztiz», azpimarratu du Alvaro Parro Balmasedako alkateak. Horren adibide dira, esaterako, Horcasitas jauregia, zubi zaharra edo San Juan del Moral eliza. Eraikin horiek ez ezik, Erdi Aroko kolore eta itxura hartuko dute asteburuan Alde Zaharreko plaza eta kaleek. Garai hartako oihal eta jantziek apainduko dute hogeigarrenez Balmaseda.
