Emakumeen Bira

Indartsuenak geratu dira

Tayler Wilesek irabazi du Birako hirugarren etapa. Amanda Sprattek bost segundo eskasengatik eutsi dio sailkapen nagusiko lehen postuari. Trekek eta Movistarrek estu hartu dute Mitchelton
Elisa Longo Borghini eta Tayler Wiles, neke eta oinaze keinuekin, atzo Santa Teodosiako ermitako helmugan.
Elisa Longo Borghini eta Tayler Wiles, neke eta oinaze keinuekin, atzo Santa Teodosiako ermitako helmugan. ENDKA PORTILLO / FOKU

Ainara Arratibel Gascon -

2019ko maiatzak 25
Eguraldiak are gogorragoa egin zuen atzo Emakumeen Birako hirugarren etapa. Horrek eta Opakuara eta Santa Teodosiako ermitara egindako azken igoerak indartsuenak baino ez zituen utzi aurrean. Galbahea egin zuten, eta azkenerako Trek Segafredoko Tayler Wiles gailendu zen. Bigarren izan zen haren taldekide Elisa Longo Borghini, 21 segundora; eta, hirugarren, Soraya Paladin (Ale Cipollini) 25era.

Amanda Spratt liderra 31 segundora helmugaratu zen, eta bost segundoko aldeagatik baino ez dio eutsi lider postuari. Soraya Paladinen aurretik 15 segundora dago Longo Borghini; beraz, lehia estua espero da gaur, azken etapan. Ane Santesteban (WNT) bederatzigarren da, eta Eider Merino (Movistar), hamargarren; 1.05era daude.

Egun osoan, txirrindulariek euria, hotza eta behe-lainoa jasan behar izan zituzten. Wilesek Opakuan gora jo zuen erasoa, eguneko ihesaldia bertan behera geratu eta gero. Saiakera hori Nicole Steigengak (Be Pink) eta Roos Hoogeboomek (Biehler) egin zuten. Minutu bateko tartea izan zuten. Gero gehitu zitzaien Ma?gorzata Jasinska (Movistar). Artean Mithcheltonek ondo kontrolatua zuen lasterketa, nahiz eta Movistar eta Trek erritmoa bizitzen ahalegindu.

39 segundoko errentarekin ekin zioten Opakua igotzeari, baina azkar joan ziren aldea galduz; are gehiago Wilesek ihes egin zuenean. Hasieran, Jasinska gai izan zen eusteko, baina hura ere berehala geratu zen atzean. Wilesek 25 segundako aldea lortu zuen, eta ondo eutsi zion errentari mendatea igotzen eta jaisten.

Santa Teodosiako maldei 20 segundoko errentarekin ekin zien Wilesek. Tropel nagusia tantaka txirrindulariak galtzen joan zen. Bakoitzak nahikoa zuen bere erritmoan igoera egiten. Horrek mesede egin zion iheslariari, azken garaipena lortzeari begira. Azken igoeran apenas egon zen zalerik, eguraldia tarteko, eta zailtasunak izan ziren zuzenean lasterketa segitzeko.

Etapa luzea eta menditsua

Antolatzaileen nahia zen lasterketa azken etapan erabakitzea; eta hala izango da. Txirrindulariek aurtengo etaparik luzeena eta menditsuena izango dute aurretik. Oñatin hasi eta bukatuko da, eta tropelak 156 kilometroko bidea egin beharko du. Bertan hiru mendate igo beharko dituzte: Udana (4,8 km. eta %4,6ko pendiza) eta Untzilla (3,5 km. eta %2,8) hirugarren mailakoak; Atagoiti ( 8 km. eta %5;) bigarren mailakoa; eta San Asentzio (6,7 km. eta %4,9) lehen mailakoa.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
Ainara Arratibel Gascon

Informazio osagarria

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna