Ekaitzaren osteko barealdia

Aurreko etapetan harrotutako su guztiaren arrastorik ez zen izan atzokoan. Lehen aste ikusgarri baten eta estreinako atseden egunaren ostean, erritmo lasaixeagoan ekin zioten atzo txirrindulariek bigarren lehiaketa asteari. Orain arteko egunik lasaiena izan zuten tropelean. Lasaitasunean ere, Mark Cavendish (Deceuninck) izan zen azkarrena esprintean, eta Tourreko 33. garaipena zakuratu zuen. Eddy Mercx handiaren marka berdintzeko, beste garaipen bat besterik ez du behar. Ez sinistekoa da, jakinda nolako bolada eskasean zebilen orain dela gutxi arte Man uharteko txirrindularia.

Hugo Houlek (Astana) Tosh van der Sandek (Lotto) osatu zuten eguneko ihesaldia. Txirrindulari azkarrenentzako etapa polita zela jakitun, Patrick Lefevererenak tropel buruan izan ziren lanean, Cavendishen mesedetan, alde egindako bi lagunen asmoak zapuzteko intentzioarekin. Tropelean patxadaz hartu zuten eguna, baina aparteko arazorik gabe harrapatu zituen bi iheslariak, helmugara iristeko 36 kilometroren faltan.

Alaphilippe (Deceuninck) tropela banantzen saiatu zen 30 kilometro falta zirela. Haizea saihetsetik jotzen ari zela baliatuz, frantziarrak tropeleko erritmoa nabarmen bizitu zuen, esprinterako lehian aurkari batzuk atzean utzi nahian. Arrakastarik ez zuen izan Deceunincken saiakerak. Hamabost kilometrora, beste hainbat talderen laguntzarekin, gauza bera egiten saiatu ziren, baita helburua lortu ere. Zuloak sortu ziren tropelean, eta Omar Fraile (Astana), Ion Izagirre eta Alex Aranburu atzeko taldean geratu ziren, etapagatik lehiatzeko aukerarik gabe.

Azken metroetan, aurtengo aldian hirugarrengoz, Mark Cavendish gailendu zen. Sekulako lana egin zuten haren taldekideek Man uhartekoari esprinta bideratzeko, eta hark erremate bikaina eman zion. Wout van Aert (Jumbo) izan zen bigarren, eta hirugarren, berriz, Jasper Philipsen (Alpecin).

Atzo, eroso aritu ziren gorengo postuetan daudenak. Azken kilometroetako haize babesak heldu arte ez ziren azaldu.

Gaur, Mont Ventoux

Guztiz bestelako ibilbide bati egin beharko diote aurre gaur txirrindulariek: Sourges eta Malaucene artean dauden 198,9 kilometroak osatu beharko dituzte. Ordekak alde batera utzi, eta lau mendate igo beharko dituzte, artean Mont Ventoux famatua, bi aldiz gainera. Sailkapen nagusiko lehiarako eguna izan daiteke.