81 urteko gizon bat zendu da, borroka batean kolpe bat hartuta

Santurtzin izan da, auzokideen arteko liskar batean. Ertzaintzak 42 urteko gizon bat atxilotu du, hilketa delitu bat leporatuta
Santurtzin, liskarra izandako etxea.
Santurtzin, liskarra izandako etxea. LUIS TEJIDO / EFE

Erredakzioa -

2019ko abuztuak 14
81 urteko gizon bat zendu da Santurtzin (Bizkaia), bizilagunen arteko borroka batean buruan kolpe bat hartuta. Astelehen arratsaldean gertatu zen liskarra, baina gizona atzo goizaldean hil zen, Gurutzetako ospitalean (Barakaldo, Bizkaia). Ertzaintzak 42 urteko gizonezko bat atxilotu du, hilketa egotzita.

Ertzaintzako eta Santurtziko Udaleko iturriek azaldu dutenez, astelehenean izan zen liskarra, 17:00 aldera, Larrarte Anaiak kalean. Atxilotutako bizilaguna hildakoaren etxera joan zen, han egiten ari ziren zarataz kexatzera. Kexuan joandako bizilaguna eta etxean bizi ziren hiru pertsonak eztabaidan hasi ziren, eta gero borrokan hasi ziren. Liskarrean zeudela, 81 urteko gizona lurrera erori zen, eta kolpe bat hartu zuen buruan. Gurutzetara eraman zuten, baina medikuek ezin izan zioten bizia salbatu: atzo goizaldean zendu zen.

Senideen salaketa

Hildakoaren senideek salaketa bat aurkeztu zuten atzo Santurtziko Udaltzaingoan; Ertzaintzak bere gain hartu zuen ikerketa, eta kexatzera joandako bizilaguna atzeman zuen. 42 urteko gizonezko bat da, aurrekaririk gabekoa. Homizidio delitu bat leporatu diote. Udaltzainek jakinarazi dute eraikin horretako bizilagunak behin baino gehiagotan kexatu izan direla hildakoaren etxekoekin izandako «bizikidetza arazoez».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna