Gizonezko bat atxilotu dute Donostiako hilketa dela eta

Igandean kalean eraso zioten Errenteriako gizonari, eta erietxean hil zen. Senideen arabera, kamera baten irudietan ageri da erasotzailea
Herenegun protesta egin zuten udaletxe atarian, hilketa salatzeko.
Herenegun protesta egin zuten udaletxe atarian, hilketa salatzeko. J.C. RUIZ / FOKU

Erredakzioa -

2019ko ekainak 20
Ertzaintzak gizonezko bat atxilotu zuen atzo goizean Donostian, joan den igandean hirian izandako hilketaren harira. Kalean zihoala eraso zioten Errenteriako (Gipuzkoa) gizon bati, Gros auzoan: lekukoek azaldu dutenez, hildako gizonaren atzetik jarraika ibili zen erasotzailea; zebra bidean zihoala atzetik bultzatu zion, eta lurrera erori zen gizona. Zauri larriak zituen buruan, eta ikertzen ari dira erasotzaileak zerbaitekin jo ote zuen edo lurraren aurka hartutako kolpeak eragin zizkion. Donostiako ospitalean garuneko heriotzan egon zen egun bat gizona, eta astelehenean hil zen. 61 urte zeuzkan.

Herenegun, hilketa salatzeko elkarretaratzean, hildakoaren alabak jakinarazi zuen Poliziak bazituela erasoaren irudiak, segurtasun kamera batek grabatuta, eta, beraz, bazekitela erasotzailea nor izan zen. Hain justu, Ertzaintzak atzo goizean atxilotu zuen gizon hori, Donostian bertan. Udaltzaingoaren esku utzi zuten, haiek ari baitira hilketari buruzko ikerketa egiten. Bertako iturriek zehaztu dute ezin dela ziurtatu atxilotua erasoaren egilea denik, eta, hain justu, «gertakariekin loturarik duen ala ez» argitu nahian ari direla. Oraindik ez dago akusaziorik haren aurka.

Donostian kalean azken urtean izandako hirugarren hilketa da igandekoa. Iazko Aste Nagusian, eraso egin zioten Urnietako (Gipuzkoa) gizon bati, eta bi hilabetera hil zen; 28 urte zeuzkan. Apirilaren 26an, berriz, 17 urteko Donostiako mutil bat jipoitu zuten udaletxe alboan, eta hil egin zen.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna