Inguruan egiten diren gainerako makil dantzetatik gehien bereizten duena, antzerkiaren zatia da Ribaforadan. Azken urteetan beste ukitu bat eman diote, tradiziotik pixka bat aldendu, eta beste bide bat hartu dute eszenografiari, argiei eta musikari dagokienez. Mass mediek zabaltzen dituzten kultur erreferentziak ohiko bihurtu dituzte ikuskizunean.
Berrikuntzak gorabehera, Ribaforadan ez dituzte tradiziozko elementuak ahantzi. Urtero bezala, dantzariek San Bartolomeren omenezko dantzak eskainiko dituzte. Haietako asko makilekin badira ere, uztaiekin eta zintekin ere ariko dira, eta giza dorrearekin itxiko dute emanaldia. Dantzariek Erriberako makil dantzetako jantzi tradizionala eramanen dute soinean.
Baina Xabierko Frantzisko plaza lepo betetzen bada, herri antzerkiarengatik da. Artzaina, nagusia, deabrua eta aingerua dira antzerkiko pertsonaiak, eta haiek arduratzen dira umoreaz eta satiraz. Ongiaren eta gaizkiaren arteko borroka antzeztuko dute, herriko txutxu-mutxuak plazaratu, eta haiek arduratuko dira kritika sozial eta politiko garratza egiteaz.
Gaurkoa ez da makil dantza ikusteko azken aukera. Cortesen irailaren 29an eginen dute, eta Ablitasen, urriaren 6an.