Bisita gehienak gazteleraz dira, baina gaur, ostiral eta larunbat artean lau saio izanen dira euskaraz. Atzo hasi ziren bisita gidatuak, orotara 25, eta haietarik bost baizik ez dira euskaraz antolatu. Bisitak dohainik dira, baina aldez aurretik izena eman beharra dago (0034) 948-42 01 00telefono zenbakira deituta edo www.iruñea.eus webgunean sartuta.
Bisitak udaletxeko ezkaratzean abiatuko dira, hiriko lehen armarri polikromatuaren aurrean. 1598. urtean egindako armarriaren binilozko kopia bat da. Bisitan Batasunaren Pribilegioaren jatorrizko agiria ikusteko aukera izanen da, baita hiriko mazoak eta giltzak gordetzen dituen beiratea ikusteko ere. Karlos III.ak sinatutako agiri horren bidez batu ziren Iruñeko hiru burguak, 1423an. Horrez gain, udaletxeko areto nagusietatik igaroko dira bisitariak: harrera gela, udalbatzak egiteko aretoa eta sanferminetako txupinazoa botatzeko baliatzen den balkoia ikusiko dituzte.
Bisita gidatuak Iruñeko udaletxean
Gaur eta larunbatean, 18:30ean, eta ostiralean, 13:00etan eta 18:30ean, Iruñeko udaletxean.