Jumbo-Visma, nahi bezala

Egun lasaia zirudiena leherrarazi egin zuten atzo Espainiako Vueltan. Berrogei txirrindulariko ihesaldi handi batek gogor lan egitera behartu zuen atzetik zihoan tropel nagusia, eta Javalambreko azken igoeran lehertu zen. Sepp Kussek (Jumbo-Visma) irabazi zuen seigarren etapa, bakar-bakarrik helmugaratuta. AEBetakoak, azken igoeran, atzean utzi zituen Romain Bardet (DSM), Mikel Landa (Bahrain) eta Lenny Martinez (Groupama-FDJ). Jumboren estrategia bikaina izan zen: lau gizon sartu zituen ihesaldi handi batean, eta lasterketa gogortu zuten gainerako liderrak zigortzeko. Kuss izan zen indartsuena ihesaldian, eraso askori lasai erantzunez, eta, atzetik, Primoz Roglicek eta Jonas Vingegaardek ere ez zuten etsi. Esloveniarrak Evenepoeli eraso egin zion, eta atzean utzi zuen. Orduan, Jumbokobi liderrak batera joan ziren Evenepoel atzean utzita, eta minutu erdi baino gehixeago atera zieten. Hala ere, sailkapeneko lider berria Martinez gaztea da.

Helmugarainoko ibilbideak 183.1 kilometro zituen La Vall d'Uixo eta Javalambreko behatokiaren artean. Jumbo-Vismaren erasoak espero ziren Remco Evenepoel (Quick-Step) liderra estutzen saiatzeko. Baina ihesaldiak hankaz gora jarri zituen estrategia guztiak. Tropeleko igotzaile nagusietako batzuk bertan sartu ziren. Besteak beste, Santiago Buitrago (Bahrain), Einer Rubio (Movistar), Kuss, Marc Soler (UAE) eta Landa.

Argi ikusi da garaipena aurrean zegoela, eta atzetik faborito nagusiak mugituko ote ziren zen argitzeko zegoen zalantza. Movistarrek erritmo bizia ezarri zuen lehen aldapetan, eta Evenepoelen Quick-Stepek jarraipena eman zion. Gailurrera iristeko hiru kilometro falta zirela iritsi zen Roglicen erasoa, eta Juan Ayusok (UAE), Enric Masek (Movistar) eta Vingegaardek bakarrik erantzun zioten.

Liztorrek hautsi zuten etapa

Atzeko taldea lehertuta zegoen. Evenepoel ere sufritzen ari zen, eta, hori ikusita, Roglicek jotzea erabaki zuen. Kolpe gogorra jo zuen mahai gainean, eta sailkapen nagusiko liderra zenak ezin izan zion erantzun. Hala ere, bukaeran aldea murriztea lortu zuen belgikarrak. Vingegaard Roglicekin elkartu zen, eta festarekin aurrera jarraitu zuten Jumbo-Vismakoek. Bikoteak 32 segundoren aldea atera zion Evenepoeli, eta, aldea murriztu bazuten ere, sailkapenean atzetik jarraitzen dute. Berdinketa teknikoa sailkapenean, baina kolpe gogorra Evenepoelentzat, atzo ahulezia erakutsi zuen eta.

Aldi berean, Kussek bere eskalatzaile dohainak erakutsi zituen etapa irabazteko. Ezin izan zuen maillot gorria jantzi. Martinez gaztetxoak etapa bikaina egin zuen, eta zortzi segundorengatik eskuratu zuen maillota. Egindako lanagatik merezitako saria lortu zuen Kolonbiakoak. Era berean, azpimarratzekoa da Kuss denboraldi honetan bere hirugarren itzuli handia jokatzen ari dela, betiere Roglic eta Vingegaard liderren zerbitzura. Hala ere, distira egiteko uneak ere badauzka AEbetakoak. 2021ean, Tourreko etapa bat irabazi zuen Andorran, eta, urte hartan bertan, Aceboko Itzulian ere lortu zuen garaipen bat. Luxuzko morroia. Bestalde, etapa lasaia izango dute gaurkoa tropelean, eta, ondo bidean, esprintean erabakiko da.