Oinarrizko eskubideen aldeko «aterpe» horia

Gure Esku Dago erabakitzeko eskubidearen aldeko dinamikak deituta, milaka lagun elkartu ziren igande eguerdian Donostian, Madrilen epaitzen ari diren buruzagi independentista katalanen aurkako auzia salatzeko. Konponbidea, demokrazia, askatasuna lelopean eta guardasol horiz koloreztatuta, Katalunia plazatik Bulebarrerako bidea egin zuten herritarrek, arbuiatzeko auzian «oinarrizko eskubideak» urratzen ari direla. Amaieran, Angel Oiarbide Gure Esku Dago-ko bozeramaileak hartu zuen hitza, besteak beste. Azpimarratu zuen botoa ematea ezin dela «inoiz delitu izan».