Birusaren transmisioari buruzko datuak eman zituzten atzo Hego Euskal Herriko agintariek, eta horiek erakusten dute aurreko egunetako goranzko joeraren ondotik herenegun behera egin zuela egun bakarrean zenbatutako positibo kopuruak: zehazki, beste 368 kasu positibo atzeman zituzten asteazkenean egindako diagnostiko testetan. Guztira, 11.247 diagnostiko proba egin ziren Hegoaldean, eta, beraz, %3,2 izan zen positiboen portzentajea. Hain zuzen ere, OME Osasunaren Munduko Erakundeak gehienezko mugarritzat ezarria duen langatik beherakoa da. Osakidetzak egindakoetan %3,3 izan da datua, eta Osasunbideak egindakoetan, berriz, %3.
Hegoaldeko lurraldeak banan-banan aztertuta, Bizkaian 158 positibo atzeman ziren herenegun; Gipuzkoan 91 izan ziren zenbatutakoak; Nafarroan, 67, eta Araban, 41.
Ospitaleei begira, Hego Euskal Herrian COVID-19ak jota ospitaleraturik direnen kurbak maldan behera jarraitzen du apurka-apurka. Jaurlaritzako Osasun Sailak eta Nafarroako Gobernuko Osasun Departamentuak emandako datuen arabera, herenegun beste 41 lagun erietxeratu zituzten COVID-19aren sintomak larriagotuta, eta guztira 292 paziente dira birusarekin ospitaleratuak, bezperan baino bat gutxiago. Horietako 188 gela arruntetan daude, eta 104, ZIU zainketa intentsiboetako unitateetan, bezperan baino bi gehiago.
Koronabirusa
%3,2 da positiboen ehunekoa Hego Euskal Herrian
Iruzkinak
Ez dago iruzkinik
Ordenatu