'Ibar auziaz' informazioa jasotako epaimahaikidea galdekatu du epaileak

Epaia edota auzia baliogabetzea ebatz dezake. Defentsa abokatuek ezingo dute elkarrizketatu atzera egindako beste epaimahaikidea
Pablo Ibar, atzoko auzi saioan.
Pablo Ibar, atzoko auzi saioan. GIORGIO VIERA / EFE

Maite Asensio Lozano -

2019ko urtarrilak 25
Pablo Ibar euskal jatorriko estatubatuarraren aurkako auzian aldaketa handiak izan daitezke datozen egunotan. 1994an hiru pertsona hiltzeaz errudun jo zuen Brodar Countyko (Florida, AEB) auzitegiak iragan larunbatean, baina ordutik epaimahaikideekin izandako gorabeherek zalantzan jarri dute auzia. Izan ere, ordezko epaimahaikide batek jakinarazi du kasuari buruzko informazioa jaso zuela auzitegitik kanpo; hura galdekatzeko auzi saio bat egin zuten atzo.

Epaitegiko langile batzuen arteko solasaldi bat entzun zuen ordezko epaimahaikide horrek, baina epaimahaia osatzen dutenek guztiz debekatua dute epaitzen ari diren kasuari buruzko informaziorik jasotzea, epaian eragitea saihesteko. Baita ordezkoek ere, auzi osoa jarraitu behar baitute, deliberazioa izan ezik. Beraz, Ibarren abokatuek auzi saio bat eskatu zuten, epaimahaikide horri galdetzeko solasaldi hartan zer entzun zuen eta beste epaimahaikideei ezer esan ote zien.

Prozesuan okerrak izan direla uste izanez gero, epaileak sententzia baliogabetzea erabaki dezake, edo auzi osoa bertan behera uztea. Atzo, Euskal Herrian 21:00ak zirela hasi zen saioa; lerro hauek idaztean ez zegoen epailearen erabakiaren berririk. Halere, aurrera segitzearen alde ere egin dezake; hala gertatuz gero, otsailaren 25ean ebatzi beharko luke Ibarri zein zigor ezarri: bizi guztiko kartzela ala heriotza.

Atzo bertan, defentsaren beste lan ildo bat itxi zuen epaileak. Asteazkenean epaimahaiko kide batek adierazi zuen ez zegoela ados ebazpenarekin —aho batez hartu beharrekoa da—. Ibarren abokatuek epaimahaikide hori galdekatzea eskatu zuten, baina epaileak ez zien baimenik eman.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna