Betis-Athletic lehia 20:00etan jokatuko da, beroarengatik

Espainiako Futbol Ligak ordu eta erdi atzeratu du igandeko Betis-Athletic partida. 18:30ean zen jokatzekoa norgehiagoka, baina ordu horretan bero sapa espero da Sevillan: 36 gradu inguru. Horren ondorioz, ligak beroaren aurkako protokoloa jarri du martxan, eta partida 20:00etan jokatuko da. Raul Garciak partidari nola helduko dioten azaldu du: «Aurreko lehietan bezala, jokoaren ekimena izan nahi dugu, agintea. Hori da Eduardok [Berizzo entrenatzailea] ezarri nahi duen estiloa, eta egokitzen ari gara».