Araban badago lurra «beharrak» asetzeko

Aitor Etxeandia Sagarlan elkarteko teknikariaren ustez, Araban eta Nafarroan «errazago» produzi daiteke sagarra Gipuzkoan baino. «Baina kontua da horretarako lurrak lortzea, eta dituenak horretara animatzea». Sagardogileen lur beharrari erantzuteko prest daude Arabako sagar ekoizle batzuk. Diotenez, badituzte horretarako lurrak. «Lautadan badaude, eta makinak sartzeko egokia dira, hango orografia dela eta». Hala dio Juan Antonio Aretxagak, Arabako sagar eta sagardogileen elkarteko lehendakariak. Hainbat bilera egin dituzte aldundiko arduradunekin, laguntzak «berritzeko», egungoak ez direlako «eraginkorrak». «2012az geroztik ez da sagasti gehiagorik landatu». Laguntzek «praktikoagoak» izan behar dutela dio Aretxagak; nabarmendu duenez, sagarrondoak landatu eta produzitzen hasteko behar den denbora —bost-zortzi urte— diruz lagundu beharko lukete erakundeek, «jendea poliki-poliki sartuz joan dadin». «Baina Arabako nekazaritzan urteko laborantzetara ohituta gaude, ez dago fruta laborantzaren kultura».