Baionako zenbait koruk, musikarik eta abarrek parte hartuko dute ekintzetan: 10:00etan egingo da lehena. Jarraian, ibilaldia egingo dute Errobi ibaitik beherantz, 12:00etan. Jende gehien biltzen duen ekintza 15:30ean izango da: Olentzero itsasontziz iritsiko da Xaho kaira, eta Mari Domingi eta gainerako ikusleak zain izango ditu.
Urtez urte egitarau antzekoa osatzen duten arren, aurten bi berrikuntza egin dituzte, Irigoienek esan duenez: «Eguberriko argia piztuko du Olentzerok Euskal Museoan, eta abenduaren 14tik urtarrilera arte egongo da piztuta; Olentzero ikusgarri egongo dahamabost egunez. Garai hauetan, gauak gaina hartzen dio egunari, gauak egunak baino luzeagoak baitira, eta hori aldatzera dator Olentzero. Argiak berriz ere iluna gaindituko du». 17:00etan izango da hori, eta bigarren berritasuna 18:00etan izango da: Txistor Gaua egingo dute. «Jarraipen bat eman nahi genion arratsaldeari, eta Txistor Gaua antolatu dute beste elkarte batzuek; Olentzero ere joango da. Lortutako diru guztia Seaskaren integrazio batzordeari emango zaio», adierazi du Irigoienek. Bi ekintza horien artean, gozokiak banatuko dituzte Olentzerok eta Mari Domingik, 17:15ean, Roland Barthes plazan. Gozokiak banatu bitartean, kantuan arituko dira haurrak eta gazteak.
Euskara, lehen lerrora
Arraroa suerta litekeen arren, badu arrazoi bat Olentzeroren Eguna abenduaren 14an antolatu izanak: «Normalean, abenduko oporretan izaten zen, oporretako azken larunbatean, baina ohartu gara asko kanpora joaten direla asteburu horretan». Hala, data aurreratzea erabaki dute, guztiek Olentzeroren Egunaz gozatzeko parada izan dezaten. «Oraindik sumatzen dut, hogei urteren ondoren ere, txoko batean geratzen dela Olentzero, eta uste dut euskal kulturaz, Euskal Herriaz... ardura dutenek gehiago baliatu beharko lituzketela Olentzero eta halako pertsonaiak, kultura irudikatzen dutelako eta euskararen erabilera ziurtatzen dutelako», esan du.
Olentzeroren Eguna
Gaur, 10:00etatik aurrera, Baionan.