Lehen garaikurra etxean lortu du Ingalaterrak

Eurokopa irabazi duten selekzioen zerrendara batu da Ingalaterra. Herenegun 2-1 hartu zuen mendean Alemania, luzapenean. Gol erabakigarria Chloe Kellyk sartu zuen, 110. minutuan. Alemaniarrei beroketan hasi zitzaien okertzen finala, Alexandra Popp golegile eta kapitainak min hartu baitzuen, eta ezin izan zuen jokatu. Neurketa parekatua eta lehiatua izan zen, baina merezita irabazi zuen Ingalaterrak. Ospakizuna erabatekoa izan zen, Wembley lepo bete baitzen. Eurokopa batean sekula bildutako ikusle kopururik handiena izan zen harmailetan: 87.192.