Osasunak ezin du hutsik egin mailaz jaitsita dagoen Lorca taldearen aurka
Osasunak huts egiteko tarterik gabe hartuko du gaur Lorca, Sadarren, Bigarren Mailako azken-aurreko jardunaldian (20:30). Iruñeko taldea igotzeko kanporaketa postuetatik kanpo dago, baina, Diego Martinez entrenatzaileak aste honetan esan duenez, azken sei puntuak lortzen badituzte Lehen Mailara itzultzeko kanporaketetarako sailkatuko dira. Hurrengo astean Valladolid aurkari zuzenaren zelaian jokatuko du Osasunak, baina, han zerbait jokoan izateko, gaur irabazi beharra dauka. Lorca, gainera, aurkari egokia da, asteak baitira matematikoki jaitsi zela mailaz, eta hondoa jota dabil. Egoera horretan, Osasunak ezin die ihes egiten utzi hiru puntuei. Martinezek aldaketa egin beharko du atean, Sergio Herrera luzerako min hartuta baitago, eta Manu Herrerak beteko du haren tokia. Sasoi guztian 38 minutu jokatu ditu bakarrik, eta denborladi osoan ordezko atezaina izan denak erantzukizun handia du azken bi partidetan.
Iruzkinak
Ez dago iruzkinik
Ordenatu