ELAk eskatu du Iraleko ikastaroak berriro abiatzeko

Eusko Jaurlaritzak duela bi aste erabaki zuen irakasleak euskalduntzeko Irale programako ikastaroak urtarrilaren 28ra arte etetea, «izurriaren egoeragatik». ELAren irudiko, erabakia Hezkuntza Sailaren «inprobisazioaren eta planifikazio faltaren adibidea» da. «Erabaki hori langileon ordezkariei bizkar emanez hartu zen».

Hori horrela, sindikatuak eskatu du ikastaroak berriz martxan jarri eta luzatu ditzatela, galdutako egunak berreskuratzeko. Halaber, «euskalduntzearen aldeko benetako apustua» egiteko eskatu dute. Hezkuntza Sailak BERRIAri esan dio datuak aztertzen ari dela eta litekeena dela gaur argitzea zer egingo duten.