Ertzaintza 4 urteko haur bati egindako ustezko sexu erasoa ikertzen ari da. Haurraren amak aurkeztu zuen salaketa iragan ostiralean, Getxoko polizia etxean (Bizkaia). Kasua ikertzen ari direla baieztatu dio Ertzaintzak egunkari honi, eta jakinarazi oraingoz ez dutela inor atxilo hartu.
Ustezko sexu erasoa jaso duen haurraren familiak azken oporraldietan antzeman zituen ustez gertatutakoaren lehen zantzuak, El Correo egunkariak zabaldu duenez. Egunkari horrek argitaratutako informazioaren arabera,ustez sexu erasoa jasan duen umeak eman dio amari gertatukoaren berri, eta aitortu herriko udalekuetako begirale bat izan dela sexu erasoa egin diona.
Salaketaren berri izan orduko, adingabeekiko abusu kasuen protokoloa abiatu du Ertzaintzak. Hari jarraiki, peritu forentseek umeari azterketa egin beharko diote.
Ertzaintzak ez dizkio salaketaren gaineko xehetasun gehiago eman egunkari honi, eta, ikerketa aurrera eraman bitartean, «kasuak eskatzen duen zuhurtziaz» jokatzeko eskatu du.
Adingabeekiko bortxa, gora
Gipuzkoako Fiskaltzak sexu askatasunaren kontrako delituengatik iaz ireki zituen auzibideen berri eman du. Adingabeekiko sexu abusuen kasuan, lau delitu izan ziren iaz Gipuzkoan: haragizko jardunagatiko bi kasu eta engainuz egindako beste bi. Aurreko urtean, 2016an, ez zen halakorik salatu bertako epaitegietan.
Fiskaltzaren txostenaren arabera, sexu askatasunaren aurkako delituak %7,7 hazi dira Gipuzkoan azken urtean; 168 kasu zenbatu dituzte denera.
4 urteko ume bati udalekuetan sexu erasoa egin diotela salatu dute
Uribe-Kostako udaleku batzuetan izandako ustezko sexu erasoa ikertzen ari da Ertzaintza. Umearen amak aurkeztu du salaketa, Getxon
Iruzkinak
Ez dago iruzkinik
Ordenatu
