Beti negatibo ez, mesedez

EBZren gordailuentzako interes tasek bost urte egin dituzte zero azpitik, eta finantza entitateek ederki igarri diote. «Luzera begira, interes tasa negatiboek finantza sistema honda dezakete», ohartarazi berri du Christian Sewing Deutsche Bankeko kontseilari ordezkari boteretsuak. Gordailuen tasa are gehiago apaltzeak «erraztuko die finantzaketa herrialdeei, baina alboko kalte larriak eragin ditzake». Europako Bankuen Federazioko presidenteak, Unicredit italiarreko buru Jean Pierre Mustierrek ere mezua du EBZrentzat: «Testuinguru honetan inportantea da Europako bankuek ez izatea lehiatzeko desabantailarik haien errentagarritasuna egituraz txikiagoa delako».

Banku batzuk jada hasiak dira gordailuak mantentzeko kostua —interes negatiboak— bezeroei, pasatzen, aurrezleei. Noraino izan daiteke joera hori kaltegarria? Era berean, tasak jaisteko EBZren argudio nagusia da dirua ez gelditzea bere gordailuetan, baizik eta erabil dadila hiritarrak eta enpresak finantzatzeko. Baina irits al daiteke puntua non tasa negatiboek bankuen kreditu jardueran jada eraginik izan ez eta bide hori ere agortu daitekeena?

Gauzak horrela, norbait ari bada presio egiten EBZri tasak gehiago ez apaltzeko, horiek bankuak dira. Eta euroguneak ondo asko daki bankuak inportanteak direla.