Marc Soler nagusi Vueltako bigarren etapan

Movistar taldeko Marc Soler izan zen atzoko Espainiako Vueltako 2. etapako irabazlea. Kataluniarra bakarrik iritsi zen Lekunberriko helmugara, Done Mikel Aralarkoa igo, eta jaitsieran erasoa jo ondoren. Hemeretzi segundo geroago heldu zen faboritoen taldea. Bigarren postua Primoz Roglicentzat (Jumbo Visma) izan zen, eta hirugarrena, berriz, Dan Martinentzat (Israel). Esloveniarrak elastiko gorriarekin jarraitzen du lider. Martin, gainera, bigarren postura igo da, Richard Carapazen kaltetan. Liderrarengandik orain bederatzi eta 11 segundora daude, hurrenez hurren.

Sailkapen nagusian hobekien kokatuta dagoen euskal txirrindularia Gorka Izagirre (Astana) da: hamalaugarren. Gaurko etapa Lodosan (Nafarroa) hasi eta La Laguna Negra de Vinuesa mendatean amaituko da.