UHINETATIK TIRAKA

Langile hilak ez dira 'ziudadanoak'

Xabier Lasa -

2019ko maiatzak 26
Politika espektakulua. Arreta handiagoa eskaini zaio Ciudadanos alderdiak Ugao-Miraballesen egin zuen mitinari istripuz hildako lau langileei baino, nonahi. Konstatazio bat da hori. Radio Euskadiko Boulevard-en, Carmen del Riegok, Antonio Losadak eta Iñaki Anasagastik osatu zuten osteguneko tertuliaren zati nagusiena, Dani Alvarez esatariak eguneko gertakizun «transzendentaletako» bat zela esan eta gero. Alderdi horrek Euskal Herrian ez dauka zinegotzi bat ere, baina debate politikoaren erdigunean kokatzea lortu zuen ekitaldia, REn zein gainerako hedabideetan. Politika-espektakuluak irabazi du, beste behin ere. Kazetaritzak egin beharko luke hausnarketa kritikoa.

Konplizeak. Kanpainari buruzko laburpenetan, zenbaitetan entzun dugu halako alderdik mitin jendetsua egin duela horrelako tokitan. Kontrara, ordea, behin ere ez zaigu adierazi halako alderdik egindako mitinean lau entzule bildu dituztela, eta horietatik bat alderdiko komunikazio arduraduna zela eta beste hirurak kazetariak. Eta ondotxo dakigu bigarren egoera horretatik asko izan dela egunotan. Telebistetan desertuaren erdian predikatzen ari zen hizlariaren irudi distiratsua bakarrik agertu zaigu, eta irratietan milaka entzuleen aurreko ahots sendoa. Aspaldi da kanpainetan kazetariak politikoen fartsa horren zerbitzura jarri zirela leialki. Honetaz gero, bolada luze baterako badugu bakea hauteskundeekin, eta ez legoke gaizki kazetaritzak egingo balu hausnarketa formatu zaharkitu eta faltsu horren inguruan.

Guztia. «Todo pasa por aquí» (dena hemendik pasatzen da) dio REk azkenaldian zirkulazioan jarri duen autopromoak. Hantustea bada inondik ere leloa, txiste merkea egiteko bidea jartzen diguna (hots, bilbotarra behar duela izan bere egile intelektuala). Zilegia da nork bere burua saltzeko merkatutekniak uzten dizkion teknika guztiak erabiltzea. Baina ez da batere erreala. Irratiak bere bitarteko tekniko eta humanoetan mugak dauzkalako, logikoki. Eta bestela ere albistez jositako gure mundu honetan hautaketa ideologikoa aplikatzen duelako, gainerako medioen antzera. Agudo batean etorriko zaizkigu gogora pertsonak, gertakizunak, ekimenak, ekitaldiak... Rivera eta Ciudadanos alderdiak baino aberasgarriagoak direnak euskal gizartearentzat, baina ez daukatenak «REtik pasatzeko» zoria.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna