Lan merkatuan gertatzen diren iruzurren aurkako borroka areagotzeko lege proiektu bat onartu zuen atzo Alemaniako Gobernuak. Lege horrek 3.500 enplegu sortuko ditu ikuskatzaileen artean. Gaur egun, 7.900 daude.
«Lan merkatu bidezkoagoa eta antolatuagoa nahi dugu», azaldu zuen Olaf Scholz Finantza ministroak, lege proiektua aurkeztean. Onartu zuen abusuak gertatzen direla kontratazioetan, eta kasu batzuetan «ia-ia esplotazio egoerak» pairatzen dituztela langileek. Sasoikako langileek bizi dute egoerarik makurrena.
Ezkutuko ekonomia egon badagoela onartu zuen Scholzek. Azken ikerketen arabera, urtean 1.800 milioi euroren galera ekartzen dizkie ezkutuko ekonomiak aurrekontu publikoei.
Inoiz baino langile gehiago
Gaur egun 45,2 milioi okupatu daude Alemanian, inoizko kopururik handiena, eta 1,5 milioi lanpostu daude bete gabe, asteartean Enplegu Agentzia Federalak azaldu zuenez. Langabeak 2,4 milioi dira (aktiboen %5,3), Baina badira azpienpleguan dauden 3.2 milioi langile ere, hau da, legearen barruan baino oso enplegu prekarioekin. Oinarrizko gizarte prestazioak lau milioi lagunek eskuratzen dituzte.
Alemaniak 3.500 langile hartuko ditu iruzurrak kontrolatzeko
Iruzkinak
Ez dago iruzkinik
Ordenatu