Sanchezek ziurtatua dauka alarma egoeraren luzapena bihar

Pedro Sanchez Espainiako Gobernuko presidenteak seigarrenez eskatuko du bihar, Kongresuan, alarma egoera luzatzeko; berriro bi aste luzatzea galdegingo du, eta hilaren 21era arte iraungo luke. Martxoaren 16an ezarri zuen alarma egoera estatuan, COVID-19a dela eta.

PSOE-UPren gobernuak ziurtatua du onarpena, EAJrekin eta ERCrekin akordioak egin dituelako. Hala ere, Sanchezek C's-rekin ere lortu nahi du adostasuna, azkeneko luzapenean bezala. C's-ek esan du «koherentziaz eta zuhurtziaz» jokatuko duela. EH Bilduk oraindik ez du iragarri bihar zer bozkatuko duen.

EAJk igandean erdietsi zuen akordioa gobernuburuarekin, eta, horren truke, Hego Euskal Herrian Eusko Jaurlaritzak eta Nafarroako Gobernuak kudeatuko dute konfinamenduaren hirugarren eta azkeneko fasea; zehazki, datorren astelehenean hasiko da fase hori.