Gimnasioek aukera eman dute kirola etxetik egiteko

Joan den martxoan, kiroldegiak itxi bezain laster, klaseak emateko metodologia goitik behera aldatu behar izan zuten Twenty Fit eta Crossfiten. Sare sozialetara igotzen zituzten egunero eskoletan egingo ziren ariketen bideo laburrak. Zuzenekoak ere egiten zituzten: Twenty Live aplikazioaren bitartez —doakoa izan da orain arte, eta irailetik aurrera bazkideak ez direnei 3 euro kobratuko dizkiete hilean—. Crossfitekoek Zoom bidez egiten zituzten, eta mantentze kuotan sartzen zuten zerbitzua.

Eskolak emateko modu berri horri esker, Twenty Fitek jarraitzaileak irabazi ditu sare sozialetako kontuetan: «Nahi zuten monitoreek egiten zituzten zuzenekoak, eta jarraitzaile pila batek jarraitu digu».