Talde bakoitzak bere dantza saioa prestatu du, tarteka elkarlanean jardungo badute ere. Besteak beste, Lantzeko (Nafarroa) inauteriari keinua egingo diote: zaldikoa eta ziripot presente egongo dira. Iruñeko Dugunako dantzari txiki zein helduek Zuberoako hainbat dantza eskainiko dituzte: Marexalen jokoa, makil dantza, Larrabürü... Zuberoari egingo dio erreferentzia Maritzuli konpainiak ere: XIX. mendeko maskaraden interpretazio bat egingo du. Zehazki, Xaho, Herelle eta beste egile batzuen maskaraden deskribapenetan oinarritu dira, eta batez ere zamaltzainen inguruko funtzioak eta jolasak landu dituzte. Iruñean, Jon Iruretagoiena ariko da zamaltzain, Dugunako dantzariekin batera.
Eibarko Kezka taldeak, bere aldetik, Donibane Garazin eta Anhauzen (Nafarroa Beherea) topatutako dantza bat aurkeztuko du, Dugunako musikarien laguntzarekin. Violet Alford ikerlariak 1930eko hamarkadan erregistratu zuen dantza hori. Aurtzaka taldearen zaldikoak, berriz, Beasaingo Igartza Jauregian du jatorria. Duela hainbat urte ohartu ziren jauregiko piktograma batean zaldiko baten irudia egon zitekeela, eta 2013an dantzan jarri zuten. Bertrand zaldikoa dakar Le Chevalet de Cournonterral taldeak. 70 urtez desagertuta egon eta gero, 2012an berreskuratu zuten.
Kataluniako dantza talderik zaharrena da Esbart Catala de Dansaires. 1908. urtean sortu zuten herrialdeko dantza tradizionala ikertzeko, babesteko eta ezagutarazteko. Kasu honetan, Cavallets cotoners dantza plazaratuko dute. 1424. urtekoa da dantza horretaz dagoen lehen informazioa, eta bi talderen arteko ezpata borroka bat adierazten du.